في بداية التسعينات كنا مجموعة اصدقاء( شواذي )عدنا ولع بمعرفة وتجربة كل شيء...ندحفس في كل شي ونسأل عالنغل ياهو ابوه!!
نقرأ كتب من اقصى الالحاد الى اقصى الايمان...واذا قلت بدينا وما لكينة كتب.. نقرأ اي شي يطيح تحت اليد... اسرار المرأة!!حياتنا الجنسية!! حوار مع الجن !! بدائع الزهور في وقائع الدهور!! الاسراء والمعراج في مكتبة الجامع!!الاعداد القديمة من مجلة العربي والتضامن وافاق عربية وحته مجلة الف باء اللي جانوا الحلاقين يخلونها بمحلاتهم للزبائن وهم ينتظرون دورهم للحلاقة....
ذات يوم وقع في ايدينا كتاب يتحدث ويعلم كيفية التنويم المغناطيسي وتعاركنا عليه عركة قبل ان نهتدي الى طريقة الطرة كتبه في ترتيب جدول لقراءته...وفعلا قريناه كلنا وتشوفنا كلمن يتدرب على طريقة من طرق التنويم المغناطيسي...ومن ضمن التعليمات ان المنوم بأمكانه تنويم شرائح محدد ببساطة واخرى يصعب تنويمها...الشخص الساذج البسيط بالامكان تنويمه بسهولة بس المفتح بالتيزاب صعب تنومه!!
منين نجيب البهل اللي ننومه الى ان تفتق ذهني الشيطاني عن الحل وصرخت بينهم وجدتها كما قال المرحوم نيوتن من طاحت على راسه العرموطة!!
وجدتها....كان جيراني وعزيزي وصديق طفولتي ولحد هاللحظة..هو نفسه يعترف بأنه افطر خلق الله وبداخل بطنه لايوجد لا قلب ولا جلاوي!!
المهم جربنا عليه التنويم وحققنا نجاحا ساحق فقد نام المسكين من اول جلسة وبمجرد خزرة او خزرتين من عيني احد المنومين المبتدأين وانا احدهم...ينام صاحبنا ويفلت الموجود....كان مغمض العينين وحين نلوح له باي حاجة يخبرنا عن اسمها ولونها ..سألناه عن كثير من الامور فأجاب عنها...من جملتها شنو رأيك بينا فلان وفلان وفلان وفلان.....كال...خوش ولد وحبابين بس شواذي!!
من كعد نسة كل شي ...ومن كبر بقة هو هو وبقينا احنه احنه بس اهتماماتنا بالتنويم اخذت بعدا اخر!!!!!