الخزيه العام لفطوهه الحراميه
ولا خلو فلس خيه يبدريه
_
خلونه انتلاطم بالبرد حفاي
واحد يكل للثاني ولك شنهاي
خيه اوفوك كل هذه انجلط عداي
ظل ايصيح الزمولي الحماميه
_
يا هو اللي يجينه امسرفن اردانه
يبوك الفوكنه ويلغف الجوانه
مو جنه شعبهم جنه عدوانه
حالف بالنبي ايخلينه عاريه
_
يم اعناد يمكن عدنه واويه
تحفر بالارض مثل الجريذيه
البيت البارحه انهد فوك دبيه
وطلعت حافيه , و تصرخ حماميه
_
خيه الكشولانه حاجز اباريس
وما يسمع ينوعه بس اغاني الفيس
يكلهم اني الماني وأسمي كريس
من البارون جد جدي الماليه
_
خابرته وكلتله : العيبي ؟ كلي نو .
جا ياهو كلتله , اوكال : هو ار يو ؟
كلتله اسويره , كال اسويره اي لاف يو
اي لاف يو ابعينك يبن رجيه
_
خيه امن القهر نكعد ابنص الليل
ومحيسن انسمعه ايصيح بيكم حيل
يسأل بالعتاوي ومنتجي اعله التيل
[ اجيبو من سرق ياترى الماليه ؟ ]
_
شتكولين خيه اترد الفليسات
سألنه رويضي اوطكنه بثلث ضحكات
اظنه ايكول ما ترجع بعد هيهات
لو من الكبر تطلعلي دبيه
_
الباك افلوسنه سوه فلك خيه
دهر طره , الضغط سواه ستميه
والسكر صعد , طوبه لعب بيه
والكرسترول الفين وخمسميه ؟
_
تعاي وجابليني اهنا يحنتاوه
دكي اوياي خيه اوعوفي التاوه
طركاعه اللفتنه من اجه شناوه
وجاب الخبر .. ظلت ترعص اعليه
_
خيه اتوزري يم علي ودكي اوياي
راح انعود خيه للخبز والجاي
خيه الفرهدانه حاجز ابهاواي
ويكل انه هاو ار يو , يحمريه
_
كالو سافر وحط باريزونه
وجلب خيه اشتراله ابيض اوبزونه
خابرته يخيه اوكال : مادونه ؟
كلتله ها ولك , مادونه ياهيه ؟
_
شتكولين هم تنباك هذه العام
اذا صارت اوروح العيبي ادك دمام
واظل اردح واصيح اصخام فوك الطام
اجونه وكنسوا الديره الافنديه
_
وين انروح خيه اونشتكي اليازين
وانجيب الحريص اعله العراق امنين
لا بالعرف يابدريه لا بالدين
يشيلون الخزينه من العرج خيه
_
كريمد ما اتحمل خيه طك اومات
طبيبه ايكول وكفت عده الفيوزات
خيه من سمع باكوهه الفليسات
ظل يرفس اومات ابسكته قلبيه
_
ولك بوكولكم مليون مليونين
مو كل الخزينه يابعد هالعين
الحرامي اللي ايبوك شكال عنه الدين
مو كال ابجهنم نار محميه
-
العراقيين كلهم زلم ياخاله
كرام وابد ما بيهم النشاله
وهيبت كل بلد بسيوفه ورجاله
واحنه ارجالنه ابعون الله نشميه
_
احنه ارجالنه البالحرب بالجبهات
زلم وانكول بيهم نرفع الهامات
مو بالباك والخلف الف ماسات
فرق بين النشامه والحراميه
اقرأ ايضاً
