محلوه أبو سراوي..هاي الاعمال اللي أتسويها مال واحد نذل وخسيس..السرسري اللي أيريد أيوكع الناس الطيبه ..وهاي سيناريوهات قديمه كلش ..لان أنت متشوف أفلام ولا أغاني ..بس اللي علمك وخلاك تتهم ناس بريئه تره الله فوك راسك ..لو أطلع أعترافات من واحد برئ وخاليه يفتر بالبنكه..أكيد راح يعترف على أمه وأبوه.. لو أدكعدوه على البطل أو تخلون صورته ويه مجاهد بالقاعده..لو أتفجرون سياره وتخلون صور الحكيم لو الصدر ودكولون شوفو التيار الصدري يكتل الناس ..هاي فيكات مال دونيه.. وشلون محمود المليجي أيريد أيوكع فريد شوقي بالمشاكل , مره أيحطله حشيش ومره فلوس مزوره ,حتى يصفاله الجو ويكدر يزوج هدى سلطان براحته , بس المخرج كرايب فريد شوقي , فيوكع المليجي بحركه مالكيه , ويعترف للشرطه ويرجع فريد شوقي الى حبيبته هدى سلطان وينتهي الفلم.. ولو تسأل أي عراقي معفن  راح يحجيلك هوايه أفلام من هذا النوع .. وأعتقد أبو سراوي يكدر أي مصور فوتغرافي أيطلع صورتك مثلا وأنت حاط جمبر وتبيع محابس وسبح بالشام .. لو أخليك بصوره تجمعك ويه شمعون بيرز.. فلا تنسى يا أبو سراوي أحنه بالقرن الواحد والعشرين وزمن التكنلوجيه والقريه الواحده.. ونصيحه لوجه الله ..هذا الملف أتلفه ولا أدكول وخليها بيناتنه..لان أنت ريس وزراء العراق.. مو ريس وزراء الكواده..

واللي سويته يا أبو سراوي ويه عضو مجلس محافظة بغداد, ويه محمد الدايني, ويه طارق الهاشمي, ويه عصابة رافع العيساوي..من المعيب يا أبو سراوي تتناوش معارضيك بهاي الافلام اللي ما تعبر علينه وصارت سلعه رخيصه..وجان عليك أن تكعد وتتحاور وياهم وتشوف وين الصح وين الخطأ.. والعراق الخايس مينحكم بحزب اللغف وحده ولا أكو بعد واحد أينصب نفسه قندره على النعل ..هذا الزمان بح ..وأحنه أنخيرك هسه لو أطلع كل الملفات اللي أدين بيها الاحزاب والكتل اللي سرقت المال العام أو اللي غشت الشعب بصفقات وهميه وبلعت وشلعت أو اللي عدها أرتباطات بدول أو بجماعات أرهابيه تعمل ضد هذا البلد ,وتسلمها للقضاء حتى نعرف الصدك من الجذب..لو تسكت وتمشي عدل وتسلم جماعتك اللي لغفو وصارو بلندن أيلعبون لعب بفلوس الشعب المسموط واللي أنطه بعمليه مشبوهه أكثر من تلاثين قتيل وفوك الخمسين جريح حتى أتغطون على جيفتكم يا دولة ريس الوزراء..

وشغلة المتظاهرين يا أبو سراوي متحتاج الى هاي المرمطه وجيب وفد ودي وفد..وشكلو لجان وجيب مؤتمر..هم هاي مو بس المتظاهرين الحفلك أيعرفوها ..لا صارت كليشه منخله ومعاد واحد يستخدمها بهذا الوكت ..المطالب تعرفها حضرتك من أول يوم..وبأستطاعتك أذا جانت عندك النيه الصادقه..وأحنه أنشوف كل نيه صادقه ما عندك.. وخلي أنكول أكو نيه..تكدر بيوم واحد أتحل كلشي ..وتلتفت ألهذا الشعب اللي يحترك يوميه بسبب فشلك بأدارة هذا العراق اللي صار كلشي بيه سلعه ينباع وينشرى وقراره بيد خامنئي..وأكيد سمعت الامريكان شكالو..أسقطنه صدام بس فشلنه في بناء الديمقراطيه..والديمقراطيه يا ريس دولة اللاقانون متجي من بره ..لا من الامريكان ولا من الايرانيين ..لان لو تطلع طويله لو كصيره وبيها ريحه جايفه ونكسه.. أحنه أنريد ديمقراطيه عراقيه وعلى قياسنه وبيها ريحة أهلنه الطيبه..وأكيد بعد متروح كل خيسة الاحتلالين ويصير حكم وطني راح نبني الديمقراطيه بسواعد كل العراقيين الجبناء..

وما خفي كان أعظم