وين عمليات بغداد وين الاجهزه الامنيه وين سوات وين الفرقه الذهبيه..فوك الستين قتيل شنو ذنبهم يا ريس وزراء العراق..وين الخطط الامنيه وين قادتك العباقره الفاشلين اللي مجلب بيهم..روح شوف بعينك قطع اللحم المتناثره شوف ألدم اللي نزفه شعبك ..أسمع ونين الجرحى.. بس كلي شلون راح تنام وشلون تجيك نفس وتاكل وشعبك ينحر يوميه من الوريد للوريد.. باوع بعيون الناس اللي ما ألها ذنب سوى أنهم عراقيين أبتلو بزمره كل همها شلون أدمر هذا الشعب وتاخذ بثار الفرس اللي أنكتلو بالحرب العراقيه الايرانيه ..أرواح طيبه راحت اليوم بسبب فشلك يا أبو سراوي بأدارة الملف الامني وأختيارك لعناصر مو كدها وغبيه..أكثر من عشر سيارات مفخخه جانت الصبح تفتر بشوارع بغداد..وين سيطراتكم يا عدنان الاسدي ويا سعدون الدليمي..هم راح تكتبون بيانات الشجب والاستنكار والادانه..شلون تسمح سيطراتكم بدخول هاي السيارات الى بغداد.. شنو فائدتها وهي ما تكدر تكتشف هاي المفخخات.. بس كادره عالعراقيين المصخمين اللي أيصبحون على أنفجار ويمسون على أنهار دم متخلص..شنو ذنبنه يا ريس دولة القانون ..

أذا متكدر يا نوري المالكي أن تسيطر عالوضع الامني وتحمي شعبك..الاحسن أن تغادر هاي المسؤوليه..أطلع وكول كدام الشعب ..يا جماعه تره أني فشلت بأدارة العراق وأريد منكم الاستقاله وخلي يجي واحد بيه خير أيدير العراق ..صدكني يا أبو سراوي راح نحترمك ونقدرك ..بس السكوت هم حرام علينه لان أرواح العراقيين مو حقل تجارب يا أبو سراوي ..كون اليوم تروح وتحط  كل المسؤولين على حماية بغداد بالسجن وطلع الاغبياء على التقاعد وتجيب ناس عدها خبره بأدارة الملف الامني ..يا عالم هذا العراق ما بيه بس ذوله الفاشلين بذاك الوكت وجابهم هسه ونصبهم مسؤولين أمنيين ..ممعقوله يا عالم ..هاي ما بيها مستحى لان الدم العراقي أغلى من كل شي يا أبو سراوي..وهاي مو خطأ واحد ولا عشره..هاي يوميه دماء تنزف بسبب الاغبياء اللي يضعون الخطط  الامنيه بدون جهد ومعلومه أستخباريه..بلد بيه مليون شرطي وعسكري وأكثر من عشرة ألاف سيطره أمنيه وبيها أجهزه ومعدات ..كولولي شلون هاي السيارات المفخخه تزرك من بين هاي السيطرات .. شنو ذوله أشباح يا أبو سراوي .. وأحنه نكول, أما أكو تواطئ بين الارهابيين والسيطرات الامنيه أو ذوله الارهابيين يتمتعون بحماية الحكومه..وهذا يثبت أن القاعده والجماعات المسلحه عدها أستخبارات أقوى من الحفلك اللي بس همهم شلون يستفزون العراقيين بالسيطرات..

على المالكي اليوم وكبل باجر..رفع السيطرات كافه في مدينه بغداد لانها أثبتت عدم قدرتها ووضع سيطرات متحركه بعناصر وأجهزه وأن يستبدل المسؤولين اللي يضعون الخطط الامنيه بعناصر وطنيه كفوءة قادره على مسك زمام هذا الملف الخطير..وتفعيل الجهد الاستخباري بمعدات وبشر لهم القدره على أستباق ما تقوم بيه القاعده والجماعات المسلحه اللي تلعب بالساحه العراقيه لعب وهمها بس العاصمه .. بس نفسي أعرف راح دكول المرجعيه اللي كلش شريفه على أنفجارات اليوم..أتمنى من الله أن أيبقيني ليوم الجمعه حتى أسمع وأشوف رد المرجعيه..وحتى ذلك اليوم..يا رب أحفظ العراق والعراقيين..

وما خفي كان أعظم