ناجحين بالبوك وشلون أينشرون الفساد ويحمون أهل الفساد.. ناجحين بالتزوير, شهادات تخرج , جنسية وشهادة جنسيه عراقيه, أنتخابات وشلون أيلعبون بنتائجها على الكومبيوتر..ناجحين في بث الطائفيه وشلون أيصبون النفط على النار.. ناجحين وبدرجه عاليه في سرقة النفط العراقي وأيداع وارادته بجيوب الحفلك .. ناجحين بالضحك على شعب صدك أنتمائهم الديني والمذهبي.. ناجحين بعقد صفقات مشبوهه وصارو مقاولين بالغش والاحتيال.. ناجحين بتدمير الاقتصاد العراقي .. ناجحين بأفشال العلم والتعلم وأنشرو الاميه بشكل فعال ..ناجحين بقتل وأغتصاب الكلمات وتكميم الافواه ..ناجحين وبطرق فعاله في الاعتقال والانزال الجوي ..ناجحين بتزويد الدول بالجماعات المسلحه والمرتزقه ..ناجحين بأستخدام الكواتم وأنشاء ورش بالعبوات والمفخخات ..ناجحين بأيجاد الطرق لبيع المواد المخدره وتوزيعها على شبابنه .. بأختصار ذوله ناجحين بكلشي ..

بس فشلو بأدارة العراق.. فشلو بتأسيس دوله من صدك بيها مؤسسات.. فشلو بتقديم الخدمات ووعود الكهرباء البعيده عن الحقيقة.. فشلو بالصناعه والزراعه وأعتمدو على المستورد.. وبالمناسبه هذا واحد من بنود الاحتلال اللي تجعل الشعب مستورد فقط  والقضاء على الزراعه ببث أصناف من البكتريا على المزارع والحقول وتخليك بحاجه ماسه الى الاستيراد.. فشلو بالحصول على ثقة العراقي..

اليوم الانتخابات المحليه.. وعلينه أن نتذكر شلون كضينه الاربع العجاف الماضيه.. المؤمن لا يلدغ من جحره مرتين.. خلونه لا نعض أصابعنه ندم.. خلونه نتذكر الدم العراقي اللي سال بسبب فشل حكومه بتوفير الامن والامان للمواطن.. خلونه نتذكر منو اللي حرمنه من الكهرباء والمي.. اليوم يومنه يا عراقيين.. أربع سنين وأحنه تحت رحمة جلادين حصلنه منهم بس الوعود.. اليوم علينه أن نختار الناس الطيبه وهي هوايه بالعراق ,اللي تريد تبني هذا العراق من صدك , مو اللي لابسه قاط وتارسه أيدها محابس وحاطه عطر فرنسي وتريد تقشمرنه وتردد تعالو نبني العراق, ومحفظتي أولا..خلونه نمسح هاي الاسماء اللي صعدناها بأصابعنه وتنكرت ونست هذا الشعب..

العراقيين أصحاب أراده.. مو شعب غبي ينضحك عليه.. هسه عرفنه منو الصح ومنو الخطأ.. منو أيريد يبني ويعمر ومنو اللي أيريد يخمط ويطلع.. تره يا عراقيين هوايه أكو علي دواي( محافظ العماره).. لو نفتش بالاسماء نلكي ناس جميله مثل العراق.. خلونه نمسح المالكي والجعفري وعلاوي والحكيم والصدر وكل هاي الاسماء المشبوهه اللي سببت الدمار والرعب ألهذا الشعب.. خلونه نختار المرشح اللي أيريد يخدم العراقيين ومو المرشح اللي أحنه نخدمه.. المرشح اللي يحمينه مو اللي هو ميكدر يحمي نفسه.. خلونه نبني بغداد الحبيبه والبصره أم السياب والعماره أم الشعر والناصريه أم الفن الجميل والديوانيه بناسها الطيبه والكوت الحبوبه والسماوه وبحيرتها وكربلاء والنجف والرمادي بأهلها الطيبين والموصل الحدباء وديالى أم البرتقال وكركوك قدس العراق.. خلونه أنكول ومنعض أصابعنه ندم.. العراق ينبني بسواعد أبناءه..ها شكلتو مو صحيح..

وما خفي كان أعظم