ما بينه خير كوه..من ألف وأربعميه سنه وأحنه بس أندك ونلطم ونمشي..ومن أنعاين واحد لابس عمامه سوده..أنشوفه شكبره ونركض وراه حتى أنبوس أيده ونمسح وجهنه بعبايته..وأذا طب ألبيتنه ..بوياي شكبرها السيد عدنه .. يا كاع أخذينه وطمينه ..ومنعرف ليش أنسوي هيجي, من غبائنه لو من بساطتنه..وجنه نسأل أهلنه كبل ليش الشيعه ميصعدون للسلطه ..أشو دائما ليوره ..والسنه همه أيخططونه وينفذونه ..وأحنه لو نايب ضابط  لو شرطي ..شنو أشبينه شنو ألينقصنه  أشو ماشالله عدنه ناس أمثقفه وعباقره بكلشي .. وجنه أنفكر لو الشيعه تستلم الحكم.. شراح أيصير ..جنه واثقين راح تنتشر العداله ألاجتماعيه والمحبه اللي تجمع كل الناس..لان الموالين لاهل بيت النبي العظيم بهاي الصوره وعلمونه هالشكل.. هيجي جان يوصلنه ..بس جنه أنخاف أنفكر بصوت عالي ..لان الحايط أله أذان ..وهيجي جانو أهلنه أيكولون !!

وبعد ألف وأربعميه سنه أجتي الفرصه وصار الحكم بيدنه..وتوكلنه على الله ..بس جنه نعرف أنو كل بدايه لازم أتصير بيها حالات شاذه ..بس جنه واثقين أن الناس اللي راح يجون ميخلون أي شاذه تعكر مسيره الحكم ..وشكد جنه فرحانين بصدك ..وأني أعتبره تحدي بين الخير والشر بين أنكون أو لا نكون ..أول أربع سنين خلصن وكلشي ماكو ..يابه ميخالف خلونه أنشوف الاربع سنين الجايه ..هاي شنو أحنه متأكدين ذوله شيعه ..بس الجماعه ضيعو راس الشليله ..لغف من باب وفساد أجتماعي من باب ..فضايح بالجمله ..أفتر عدنه الديلكو.. معقوله ذوله شيعه ..ذوله شنيعه..واحد يطلع يحجي على منجزات وهميه وأيكول لازم أيحافظ عليها..بس بشرفك يا منجزات ..أخاف تقصد منجزاتكم وقصوركم بره وملياراتكم ببنوك الخليج وأوربا ..ولك أي منجز حققتو ..مو أنت متطلع وحتى لو تطلع تلبس نظارتك السوده فراح متشوف شي .. تره الخيسه والزباله صارت تلال عمي أبو سراوي.. وماكو شارع بيه خير ولا رصيف ينطلع بيه..ولا متنزه للعوائل الخايبه تروح ترتاح بيها..والكهرباء والمي الجايف خو ويه ولاياتك..بس تبقى أنت الاقوى والله صحيح..أنت الاقوى بعصاباتك..لاجم الوادم من فوك ومن جوه  !!

لا لهنا ونوكف ..هذا أيسمونه أكلان خ.. وترس.. بويه لحظه, هذا أكيد حكم شيعه ..تعالو كلونه أشسويتو للناس مو للعراق .. طز بالوطن ..أنريد نعرف أسوتنه الشيعه للناس الشيعه..هاي عشر سنين أشو كضيتوها بس بوك, أخمط وأطلع..وللعلم الحراميه أكثرها من الحفلك المحسوبه عالشيعه .. بلد صار في عداد المفقودين .. وضع مأساوي والناس خايفه من شي راح أيصير .. فساد أجتماعي علني .. دك بوكسات وضرب من تحت ال..... ومن فوك الصره ما بين ألاحزاب الشيعيه نفسها .. كل هاي والسنه بس أيباوعون على خيبتنه .. تعالو وين أقتصادنه وين زراعتنه وين صناعتنه وين مشاريعنه وين ناسنه الخبره.. بلد يعتمد بس عالنفط والتالي شنو وشراح أيصير محد يعرف..عدنه حكومه شيعيه.. صحيح.. بس ما عدنه دوله وماكو مؤسسات تعرف شتسوي لان ما كو خطه واضحه أو منهاج تمشي عليه..عدنه مافيات ,ومافيات بالمعنى العلمي..هيه أدير حكومتنه الشيعيه.. وين العداله الاجتماعيه اللي أينادي بيها أهل البيت..أنا أخوك..همه ذوله الشيعه!!

أتشوف نوري المالكي وأبراهيم الجعفري وعمار الحكيم ومقتدى الصدر وهادي العامري..ذوله مو شيعه.. ذوله هتليه ونقمه, وهمه اللي ضيعو هذا المذهب.. وسبب أكراه الناس الاخرين الى الطائفه الشيعيه..وين راس المرجعيه الخاتل ..ميشوف ذوله المحسوبين عليهم شديسون بالشعب ..حتى الواحد بينه صار يستحي أيكول أني من طائفه الشيعه ..يعتبرونه روافض ..لان نرفض أشتراك الاخرين ويانه بالقرار وبأداره الحكومه ..بس يا جماعه تره ذوله القشامر ما ألهم علاقه بطائفه الشيعه ..لا تخلطون ..ذوله السرسريه دازيهم علينه..أحنه نتبره منهم ..تره طائفه الشيعه أتحب كل البشر ومتفرق بين هذا وذاك ..أكو الله هو يعرف وهو أيحاسب وهو أيشوف ذوله الجايفين شديسون بالشعب ..شايفين هيجي مله تعبانه بس بالحجي الفارغ محد يلحكهم..ذوله ناس عدهم أنفصام بشخصيتهم ..يحجي شكل وينفذ شكل ..وأتحدى التحالف أذا عنده مشروع وطني مكتوب أيوضح عملهم وأسلوبهم بأداره حزب أو دوله..كلشي ما عدهم بس هوسه..وميخلون الناس اللي عدها خبره بأداره الدوله..لان يطلعون خياسهم أولاد الكلب..أتريدون الصدك..الحكم للسنه هواي أحسن..عوافي عليكم!!

وما خفي كان أعظم