فتكها نوري المالكي بس هاي النوبه ما تتخيط وما تتركع.. نية أبو سراوي الكشره جانت أقتحام ساحة أعتصام الرمادي, بس علي غيدان غيرها وراح للحويجه حتى أيوصل رساله لمعتصمي الانبار ونينوى تره السره وصلكم.. هذا الباب اللي فتحه المالكي وكدر أن يضرب الجيش بالشعب راح يفتح نار جهنم عليه وعلى كلمن سانده بسفك الدم العراقي .. لان دم الحويجه ودم البصره وكربلاء هو دم عراقي واحد.. لا المالكي ولا غيره يكدر أيفرقه.. وكل ما كاله غيدان والدليمي عار عن الصحه.. الفجر جانت مكبرات الصوت أتنادي بخروج الناس البريئه من ساحة الاعتصام.. بس اللي طلع المسلحين وتركو سلاحهم وجانت خمس بنادق كلاشنكوف ورشاشه نوع بيكسه وبس.. واللي بقى همه المعتصمين الابرياء واللي قوات سوات القذره ضربتهم بقنابل مسيله للدموع وبخراطيم المي وبعدين ضربو المعتصمين بالاسلحه وحركو الخيم وداسو بعجلاتهم على الجرحى.. وقائد المجزره متأكد أن المسلحين طلعو وبقى بس المتظاهرين ومع هذا نفذ أوامر القايد العام بأرتكاب الجريمه البشعه اللي راح ضحيتها أكثر من تلاثين عراقي والعشرات من الجرحى ..وأكو متظاهرين أعتقلوهم وأخذوهم بسيارات الشرطه اللي جانت واكفه براس الساحه.. والمعتصمين جانو يحملون العصي للدفاع عن نفسهم وتم تصويرهم من قنوات فضائيه وعن طريق الموبايل..  
اليوم نوري المالكي أشرس من البارحه خاصة بعد أن كدر أيسيطر بالخوف وبالتزوير وبالرشاوي على مصير الانتخابات المحليه.. المالكي صار هو القاضي اللي يصدر أوامر ألقاء قبض ويسجن الضحيه ويطلق سراح الجلاد.. ويطلق على هذا صفة شهيد وعلى هذا أرهابي من القاعده وأفلام النظام النظام السابق ..وميعترف بالاحزاب اللي أتشاركه السلطه ولا عنده ثقه بيهم.. وأصبح مستبد برأيه وراح أيقود الشعب للمجازر لانو وصل حاله من الشعور هو الاقوى والافضل وعلى الجميع تقديم الولاء والطاعه.. اليوم على المرجعيه اللي نصبت نوري المالكي سلطانا على هذا الشعب المسلوب الاراده أن تزيح شبح الدكتاتوريه..أحنه مصدكنه نخلص من دكتاتور أرعن يطلعنه دكتاتور عفطي أيقود البلد والناس الطيبه للطائفيه والقتل على الهويه من جديد.. لازم أتكون كلمه للسيستاني لان دم العراقيين بركبته كبل ميصير شي لا يحمد عقباه.. شنو دور مارتن كوبلر والامم المتحده اللي اليوم هي عاجزه ومشلوله وما كدرت أتسوي أي شي أمام التسلط والاضطهاد..
الخزي والعار للقائمه العراقيه وزراء ونواب أنتهازيين يركضون وره الكراسي والجاه وشعبهم اللي أنتخبهم يقتل بقوات نصها أيرانيه.. العار كل العار للي كاضيها بس أجتماعات وأدانه وأستنكار .. المفروض تنسحب أنت وأقزامك .. ما بيكم فايده كوه بس مؤتمرات وعوي.. والله دم هذا الشعب اللي سال بالحويجه يبقى بركبتكم يا سفله.. وعبالكم نوري المالكي راح يكعد ويخاف من هوستكم وبالوناتكم الجذابه.. شوفو شلون راح يدخل حتى بغرف نومكم ويرعبكم.. وهو ميهتم لا بحقوق الانسان ولا بالقانون الدولي.. وراح ينهي كل ساحات الاعتصام ما طول هو القايد العام والجبان سعدون الدليمي موجود, أذا ما توكفون بوجهه أفراد وعشاير..   
بالمناسبه نوري المالكي راح أيوزع عشرة ملايين دينار لكل شهيد بالحويجه وخمسة للجرحى.. لان الدم العراقي كلش رخيص وينباع بأبخس الاثمان.. شوكت أيصلح المالكي نفسه ويخاف الله..
وما خفي كان أعظم