وضع أمني كلش صعب.. والغبار اللي هب على بغداد ينذر بوقوع كوارث .. والجميع يتحضر ليوم الجمعه ..أكو شي راح أيصير..أرتال من الجيش العراقي تجي من الجنوب بأتجاه صلاح الدين.. وكل صلاح الدين وقراها ونواحيها مطوقه ..قوات سوات القذره تحكم السيطره على مناطق في بغداد.. دبابات تسوي حزام حول منطقة سليمان بيك .. طيارات مروحيه تحوم فوق مناطق بعينها ببغداد.. تشوف ضواحي العاصمه عبالك ساحة حرب ..مركز الموصل هادئ بس القرى والنواحي  تشتعل فتره وتنطفي فتره ..هوسه في الرمادي والعشاير هي المسيطره على الوضع ..تصريحات أعلاميه متشنجه لدولة القولون تحضر للفتنه.. كل السياسيين اللي يحكمون العراق مخابيل وبيهم هوس ,ولا واحد بيهم عاقل يكدر يبعد النار اللي راح تجي وتحرك بس الشعب الخايب وهمه أيعرفون شلون يتخلصون منها.. كلمة نوري المالكي اليوم واللي ذكر بيها عشر مرات الفتنه وهو سبب هاي الفتنه وهو مثل واحد أيحط الخنجر بظهر أخوه ويباوع على وجهه ويكوله العفو تعال نتفاهم لان الحوار هو اللغه اللي توصلنه للحل.. حس على نفسه وشاف الوضع خطير وشبح الموت أيحوم حول ركبته.. البارحه عمل كارثه بكل المقاييس الانسانيه والقانونيه واليوم يجيك ويكلك خلي ننسى المضى ونصير أيد وحده ضد البعث والقاعده.. وحتى دم الابرياء اللي راحو ضحيته بعده منشف وخيم العزى منصوبه بالشوارع.. شوفو شلون عين صلفه يكتل البرئ ويمشي بجنازته ويصيح الله أكبر على القتله واللي جان سبب بسفك الدماء.. هذا شنكول عليه..أما مريض نفسي ولازم أيروح للطبيب أو هذا المالكي لوتي وملعب ويلعب على الحبلين..وأحنه أنشوفه فرد واحد مشيطن يضحك على الشعب بالبيضه والحجر..

كل مره يخلق أزمه وتروح بيها ناس بريئه علمود أيغطي عجزه وفشله بأدارة البلد أو حتى يبعد قصص سرقة الاموال العامه والفضايح اللي طالت زمرته الطائفيين..مره يوصف القائمه العراقيه بالارهابيين والقتله وذوله وياه بمجلسي الوزراء والنواب.. ومره يتفق ويه الكورد وبعد شهر ينقض الوعد ويسوي أزمه ويه اللي صعده للكرسي.. والامس راح أتغدى ويه الحكيم حتى أيشكل أغلبيه بالمحافظات بس الحكيم يعرف شيريد المالكي وأعتذر منه.. وهسه راح أيوافق على النقاط الكورديه بس وحده وحده حتى يأخذ وقت أكبر وبعدين يضرب كل الاتفاقات عرض الحايط.. أكو فد خلل براس هذا المالكي وهو أيكود العراقيين كود الى نار بس رب العالمين يعرف شلون أيطفيها..

 ورطه وتورط وعباله مثل كل مره راح يطلع منها..ويكول الحويجه تدعونه للتدبر وعدم تكرارها..بس هو أيفكر غير شي.. وهاي أتذكرنه حرب بوش الجلب على العراق عدما جان يتمشى بالحديقه وعلى أساس بعده ما ماخذ أوامر الغزو.. بس الحقيقه أدكول هو ناطي الاوامر بالهجوم.. وهسه المالكي أيعيد نفس السيناريو على صلاح الدين والرمادي والموصل وبغداد وديالى.. وأكو سطور مخفيه وره كلمة نوري المالكي راح نشوفها بالايام المقبله..أسأل الشعب العراقي..تعتقد أن المالكي رجل صاحي ومو مريض نفسي وهو أيوصل العراق الى بداية الهاويه ويريد يشعل البلد بحرب طائفيه حتى يحتفظ بالكرسي..جم دوب يا وطن..

وما خفي كان أعظم