ما بعد منع استيراد الخمر ( إذا تم تطبيقه فعلاً ) ولكي لا توزع الاتهامات مجاناً
شوية خلينا من الجانب القانوني وصحته لأن الدستور نفسه عليه مشاكل
وخلينة من حرمة الخمر أو عدمه ( فوفق الشريعة الإسﻻمية يعدّ شرب الخمر محرم )
لكن خل نسولف بجدوى هذا القرار وفاعليته ..
1- إذا انت جاد فعلاً وتريد الصلاح للمجتمع بمنع الخمور ، لازم نقدملك هذا السؤال : وين مراكز التأهيل لمدمني الخمر ؟!!
حين يتم منع الخمر في دولة ما ، لابد من وجود مراكز تأهيل لمدمني الخمر ، لأن عدم وجودها يعني :
- ظهور نسب وفاة بسبب التصنيع المحلي للخمر .. وهاي الحالة صارت وانتشرت بايران وبدت تجي نسب وفاة سببها استخدام الخمر المحلي ، حتى بالـ 2013 فتحوا مراكز تأهيل لمدمني الخمر حتى يجي يبطل ادمان .
- انتشار " الجريمة " لأن المدمن مدمن ومتفيد وياه العنتكة والهوبزة ( وهاي تشمل مدمني المخدرات أيضاً ) ، قبل الناس يمنعون ولدهم من التدخين مو بسبب أضراره ، بس لأن التدخين ادمان .. والعوز كاتلهم ، يعني ابنهم اذا ماعنده فلوس يشتري جكاير ممكن يسوي أي شي حتى يحصل باكيت ، أو جكارة وحدة !
- التهريب وظهور البدائل من المخدرات هاي الناس سولفوا بيهن ماريد أعيدهن .
2- شرب الخمر حالة منتشرة وماريد أناقش هل هي أقلية أو أكثرية بالنسبة للناس ولا مخاطر الادمان وتأثيره على السلامة العامة .. لكن ! بما أنها حالة منتشرة .. لازم نتعامل وياها بالطريقة الصحيحة .. وخل أجيبلك مثال
الاسلام كان يرفض العبودية ، ولكن نزل بمجتمع بيه العبودية نظام اجتماعي قائم ، يمنعه رأساً ..؟ طبعاً لا، لأن راح يسوي كوارث اجتماعية بتشريد عشرات الآلاف من العبيد في الشوارع ودفعهم الى الجريمة حتى يعيشون وبوكت النبي لا منظمات مجتمع مدني ولا أكو رعاية ولا هالسوالف.. شسوة النبي ؟ قنن لهاي العبودية المنتشرة ، سوالهم حقوق ، كام يدافع عنهم .. واجت طريقة هدم نظام العبودية شوية شوية ، واحد منها أن الكثير من الكفارات الي يكفّر بيها الانسان عن ذنوب معينة هي :عتق رقبة .
القصد : من تريد تمنع الخمر وهو قائم بالمجتمع لازم شوية تصير واقعي حتى لا تتسبب بمشاكل أكبر من تداوله ( هاي اذا فرضنا دستورك يسمح ! ) ، من تداول البدائل ، او ظهور مافيات التهريب .. وهاي تجارب المفترض احنة عابريها ، بس شنسوي لحظنة الأغبر
3- كمؤمن لازم أفرّق بين الدين ، وبين من يستغل الدين حتى يتسلقني ويصعد براسي .. تفهم ؟ آني لا كيوت ، ولا منبطح ، ولا هالاتهامات المدري شلونها.. بس أكو شي اسمه عقل ، واذا تريد تحدّ من الخمر لازم تتصرف بعقل حتى تكون مُصلح.. واذا قبلت على نفسي أن تضحك علية بهيج قرارات ما تعالج شي مجرد هوسة فآني "غبي" ..
كمسلم آني مؤمن بحرمة الخمر .. لكن غير مؤمن بهذه السلطة الي تريد تتسلقني بهاي السوالف .
4- أي قرار يتشرع لازم يلحظ المشرع الحالي مدى قابلية تطبيقه وآثاره الجانبية السلبية والايجابية .. وهل سيتحقق ويحقق نتائجه الايجابية في ظل هاي الظروف او لا .. بكل مشروع لازم يكون سقف الاهداف واقعي
5- كنظام دولة تكدر تقنن وتحاسب وتحدّ ما يعمل على عدم تأثير الي يشرب على المجتمع ، كعدم القيادة اثناء السكر او الشرب بالاماكن العامة والى آخره .. ويبقى ذنب الشارب على روحه .. اساساً شغل الدولة بهالمجال منع الافراد من التأثير عالمجتمع.. مو منعهم من المعصية ، ولو كان شغل الدولة منع الافراد من المعصية فالمفترض يسوون عقوبات وسجن على الكذب والغيبة والنظر بشهوة نحو السافرة وتجريم استيراد الغناء ومنع شركات الانتاج الغنائية وغلق الفضائيات الغنائية بل ورفض أي مساعدة مالية من الدول الغربية ( الي قسم من فلوسهم من ضرائب الخمر والملاهي ) لأن هذني أيضاً معاصي ..
6- فرق الخمر عن الحبوب أو المخدرات بدرجة التأثير الصحي وكونه مطّب أعظم من مطّب الخمر بمراحل ومراحل ، مو لكونه معصية حتى نقيسه عالخمر! ضيفلها أن جرعة من المخدرات تسبب الادمان عكس الخمر ، ضيفلها ان ادمان المخدرات غير ادمان الخمر من ناحية التأثير على المجتمع .. ضيفلها ان الخمر لا يصنف من المخدرات ، إضافة الى أن الكثير من الحبوب هي اساساً علاج وغير محظورة الاستيراد لكن مقننة لأستخدامها في محلها وبالشروط والضوابط الموجودة ( هاي الفقرة خاف أحد يحب يحتج : لعد ليش الدولة تحاسب عالحبوب وتسجن واحنة قابلين ) .. اضافة الى ان الدولة هنا مطالبة بتوفير مراكز تأهيل المدمنين !
ملاحظات مهمة :
- هدف المنشور الأول تعرية اصحاب هاي البطولات الكاذبة للضحك على الذقون بقرارات ما تقدم ..
- آني أكول الخمر حلال؟ طبعاً لا لأن بحكم كوني مسلم أعتقد الخمر حرام
آني مع استيراد الخمر مثلاً ؟
الجواب : بما أني أعتقد بحرمته أكيد أعتقد بحرمة استيراده ، لكن هنا دعوة للتعامل بعقل مع الواقع ..
وناخذ بعين الاعتبار آني أعيش بدولة مدنية وقوانينها وضعية ، واسطوانة الفقرة الاولى والثانية والثالثة من الدستور ما الها ربط بهالفعل خاف يحب أحد يحتج بيهن .. لأن أكثر الي يكتبوهن ما جاي يميزون بين كون الاسلام مصدر أساس للتشريع أو كونه لوحده المصدر الأساس للتشريع ! كما في السعودية
شغلات مثل الحفاظ على الهوية الاسلامية للشعب أيضاً لا تعتبر مبرر ، لأن هاي اذا تاخذها من هذا الباب لازم تحّجب بيها النسوان بالفرض بقانون هم.. ومثل ما تسأل : وين اكو شعب هويته اسلامية بيه محل خمر . هم يجي واحد يعبر زايد ويسأل : وين اكو شعب هويته اسلامية وشوارعه متروسة نسوان بلا حجاب وشركات انتاج الغناء المحرم هو وماله .. الخ
- كمسلم ما أحب أن تمارس الدولة فرض طاعة الأحكام الشرعية على الناس بالقوة لأن الطاعة والمعصية.. الله خيّر الانسان بيهن، وفرضهن بالقوة يعني تشويه الدين والطعن بيه .. الي يخلّ بأمن الناس وسلامة الدولة والمجتمع هذا الي تحاسبه الدولة !
- اذا تتصور توجيه النقد لهكذا قرار في ظل هكذا ظرف يعني بالضرورة ان الناقد يشرب خمر فهذا معناه ان الي يدافع عن حقوق الحيوان حيوان !
الي يحب يهوّس علينة هنا ترة صارلي عشرين سنة عايش بالعراق شبعت هوسة وكل حظ ما صار براسنة
#جبناها_على_مادلين_مطر
#تعرف_ربط_مادلين_مو
