طبعا كلش عيب وخزي على نوري المالكي أن يشمر فشله السياسي بأدارة العراق وأنهيار حكومته على القاعده وأفلام النظام السابق.. والجميع يعرف أن المسلحين سواء كانوا نقشبنديين أو بعثيين هم عصابات, ما عدهم أستخبارات وأمكانات وأجهزة حكومه تمتلك, مليون ونص جندي وشرطي وسوات وفرق قذره وقندره وطيارات وكلشي وكلاشي .. فمن الاجدر بنوري المالكي  أعلان أنسحابه من السلطه وترك العراقيين يختارون اللي يكدر على تحدي الجماعات المسلحه ويبعدهم عن البلد.. في كل خطاب ولقاء أنباوع على وجه المالكي وهو ذليل خانع ,يكرر نفس العبارات اللي كالها في ولايته الاولى ,مره يشمر عجزه وغباء مستشاريه على البعثيين ومره يوصف شعبه بالارهابيين اللي عدهم أجندات خارجيه, وبس يريد يشعل نار الفتنه بين العراقيين, وكلنه شفناه من ضرب الجيش بالشعب في الحويجه.. وجان يتمنى أتصير معارك بين الجيش والعشاير العراقيه في سليمان بيك حتى أتفوخ دودة الطائفي ياسين مجيد والمعمم العلاك, لو ما أدخل محافظ صلاح الدين ووجهاء المنطقه وفشلو خططه الخبيثه .. نحن نرى أن هيبة الجيش والحكومه من هيبة الشعب أولا يا هيبه.. وهيبه الشعب تجي من أحترام سياسيي هذه الحكومه للمواطن..مو أواعدك يا وعد وأسكيك يا كمون.. مو المواطن هو هدف ومشروع للاعتقال والتصفيه ..

شوفو هسه نوري المالكي وزمرته عندهم هيبه من الشعب.. بالتأكيد لا .. لان لا خير بحاكم ينعت شعبه بأوصاف دونيه ويحتقر أجزاء منه ويهد عليهم قواته حتى أيذلهم ويكسر خشومهم وبعد محد يرفع راسه ويطالب بحقوقه المشروعه..فشلون أتصير للشعب هيبه, فتحصيل حاصل الحاكم نفسه راح يفقد هيبته أمام شعبه أيضا.. والهيبه مو بالكوه ولا بفرض الخوف وسد حلوك الوادم ..لان وكت العبوديه والتسلط راح بروحة السلاطين والامراء والدكتاتوريه.. وكل حاكم أيريد أينصب نفسه سيد ودكتاتورعلى هذا البلد راح أيواجه صبات كونكريتيه تكسر راسه وراس اللي يوكفون وياه..

ويمكن أيرد المالكي أو زمرته ويكول صناديق الاقتراع هيه الحل الامثل للديمقراطيه وهذا المالكي فاز بثمن محافظات.. أحنه أنكول.. الجميع يعرف شلون فاز أبو سراوي بهاي الانتخابات وشلون وكع بأخطاء, لان الاغبياء اللي دزهم يا سبحان الله مثل اللي أنطاهم الملف الامني بيدهم , محسبو عدد المصوتين اللي شمرو أوراق الاقتراع بالصناديق وسجلو أسمائهم ويه عدد الاستمارات.. وبكل محافظه أكو أكثر من مية ألف أستماره زايده عن العدد اللي راح وصوت ..شلون طلعت عدد الاستمارات أكثر من عدد المصوتين..وشلون أكو صناديق بالعاصمه أتبدلت بصناديق مشابهه ومدعومه .. وشلون أكو ناس وصلتها أستمارات الاقتراع كبل ليله الانتخابات ومختومه وبشكل رسمي ..هذا مو أتهام للمفوضيه لا بالعكس ذوله الموظفين جانو صادقين بعملهم بس أكو واويه وبتالي الليل همه من لعبو جوله وأستلمو حسابهم وخلي ياكلون مدام خالهم بعده بالوجود.. يا جماعه نوري المالكي وزمرته أيضحكون علينه حسب طريقتهم وبالوكت اللي همه أيريدو..

وما خفي كان أعظم