العراق تايمز ـ كتب علي الزيدي على صفحته الشخصية في موقع التواصل الاجتماعي "الفيسبوك"
القسم الداخلي كان بيه ثلاجة وحدة مكانها بنص الدرج، يعني بين الطابق العلوي والأرضي، ويتشارك بيها ٢٧ طالب ، وطبعاً أكيد زايدة علينا، باعتبار الجميع مفلسين والحمد لله . المهم سالفة المسواگ والثلاجة وليش زايدة علينا بيها هواي تفرعات واحزان، وأشجان ، بس اذكر وحدة منهم عالسريع . القسم الاعلى من الثلاجة - الخاوية - هو قسم التجميد، يعني الفريز، وهو طبعاً بدون باب لأن هية الثلاجة أصلاً بمكان مايذبوهه بالزبل جابوهه للقسم الداخلي هدية وثواب. وهذا الفريز طبعاً دائماً فارغ لان شنو نجمد بيه مثلاً واحنة اقوى وجباتنا بيض وطماطة وخبز ابو الحصو . والطاوة تنحك بكاغد سمبادة ولا بخبزة سنگكية قبل ماتنغسل بماي نسبة الملح بيه 45% وصابونه ام التايت نسبة الجص بيها 89% وطبعاً كالعادة في كل المجتمعات العاقلة لازم اكو متمردين ! احم احم . حبيب قلبي سيد عمران العلوي مغامر ولا اكبر عبسي يلحگه، رحنا سوية للگصاب حتى نكمل نواقص مرگة الباميا، طبعاً الطماطه الممرودة صايرة بالاساس معجون ماتحتاج مرد، والباميا مانذب حتى الگعوم مالتها لان بس نص كيلو مشترين. اجينا الگصاب نرصد من بعد 200متر السطل الاحمر اللي يذب العظام بيه بعد مايگشرهم ومايخلي بيهم ولا ريحة لحم ، اذا السطل موجود نروح واذا مموجود تروح التشريبة من الجدول اليوم ، ثنينا طبعاً ندري بيه مايبيع العظام ويذبهم بالزبل بعدين، بس هذي الكليشة واجبة ، سلام عليكم اغا بيش الكيلو ؟
يگول بدون فلوس ! شگد تريدون اخذوا
انطينا كيس رحمة لاهلك الخوش يگشرون.
ونترس الكيس عظام وننطلق للقسم بالغنيمة . ذاك اليوم ولسوء الحظ كانت بنيه طهرانيه كلش حلوة بس تحط لها جناحات تصير ملاك، واگفة تريد تشتري لحم . اني طفرت الشارع كالبرق ، سيد عمران خطية نسى الفظيحة اللي شايلها بأيدة وبقى مترهّي كأنه مشتري فخذ والسبب شافها تباوع عليه بشكل غريب فتجمدت اطرافه قبل عيناه ، هية اجت مباشرة وسألته : شنو تسوي بهذي العظام ؟ سيد عمران طبعاً اكيد مايسولف لها على الباميا والراس ثوم والطماطة الممرودة ، لأن هم عيب وهم ماتعرف الباميا اساساً ولاسامعة بيها. فالجواب الوحيد المتبقي هو : عندنا كلب بالبيت وهذا كله للكلب المدلل . طبعاً هية ابتسمت واكيد صدگت لان السيد مو مبين عليه الچذب وطريقة جوابة كانت تنم عن احترافية ودقة واقتدار. الملاك گالت اوه اوي أوه وگامت تسأل عن الكلب والسيد يوصف لها منين اشتراه وشگد صار عنده وشگد عمرة وشلون مفرغ له غرفه خاصة بالحديقة . ) المهم- سالفتنا- هذا الفريزر فارغ دائما ماعدا ذلك اليوم اللي خلينا بيه نص كيس العظام والنص الثاني سويناه تشريب اني وسيد عمران العلوي وسيد عامر العلوي وسيد طالب العلوي وسلمان البهادلي ، وسيد مطر طبعاً هم جابته الريحة واجه نام بالغرفة قبل لاتكمل الطبخة . المهم - سالفتنا - الفريزر كل يوم فارغ واني اخلي بيه قوطية الحليب السيريلاك الفافون، ماكو عراقي مايعرفها، اترسها ماي واخليها بالليل بعد ماتنام العيون المتربصة بالقوطية شراً. وبما ان نسبة الملح بالماء 45% فبالكاد ثاني يوم الضهر يالله تجرش القوطية استعداداً للانجماد . اني كالعادة أول شي أسويه بعد دخولي للقسم اخذ القوطية بطريقي من اصعد لغرفتي اللي هية أول غرفه بالطابق العلوي يعني مباشرة عند الدرج، حتى اذبها بالترمز الوحيد بالقسم ! واشرب ماي بارد وتباً للعجوزية والتنابلة . افتح باب الثلاجة واذا بالقوطية فارغة بدون ماء وجامد بيها الهوى بالفريزر وتباً لعلي الزيدي ! والفاعل مجهول طبعاً !
زين يافاعل يامجهول لو شارب نص وتارك نص !
وبعد تكرار الجنحة المذكورة في سرد النص ادناه لأكثر من مرة وبقائي بلا ماي بارد لمدة مدري شگد قررت لوحدي وبحظور القوطية المسجاة أمامي فارغة بتحويلها إلى فخ لذلك الجاني الوقح وبعد عدة تجارب فاشلة من ملئها بالماء المخلوط بالفلفل مرة وبالتايت أخرى وبالحبوب المسهل مرة اخرى، انتهى بي القرار إلى ملئ القوطية بربع كميتها من الماء وباقي ثلاث ارباعها بالملح واذابته جيداً ليتحول الى محلول شبيه بالماء النقي لكنه عبارة عن سائل تيزاب مركز بعد انتهائي من الدرس لم اذهب الى اي مكان كما هي العاده وذهبت الى القسم الداخلي للتربص بالثلاجة وبذلك الماكر الجوعي ، ولم يطول انتظاري حتى انشحط احدهم على الدرج بباب الثلاجة واختنق من شدة تركيز الملح وركض للمغسلة وفتح حنفية الماي داخل حنجرته وهوة يگح ويضـ .... واخيراً لگفتك ياتحفة...
ملاحظة : بعد هذه المكيدة گام الاخ مايشرب حتى من الترمز اللي بغرفتي الابعد أيمان مشددة بأنه ماء قراح خالي من الملح سوى مليحات رب العالمين الـ 45%.
الله يذكركم بالخير جميعاً.
