احدى التحولات الكبيرة التي احدثتها الحملة الايمانية على الرفاق هي ؛ تحول الرفاق الى اقتناء السبح السندلوس والكهرب ابو الكركوشه بدلا من التجعبن بكراب المسدس ابو الكركوشه  وراجت تجارة الخرز وعرج السويحلي.. وعافوا المباديء ولزگوا للسحارين واهل الخيرة وانتشرت التكايا بشكل ملفت . خالد الله يرحمه كهربائي محله بالشيخ معروف وكف شغله راح حطله خرگه قماش وطش فوگاها حصوا مال كاشي نظيف بحجة خرز محبة . الله جابه بوحده اجلكم الله دلالة  بمحلة الذهب يومية شايلة حفنة حصوا ورايحة وهذا مكيف عليها  الى ان شالوا المكافحة .. طلعت بايعه حصوه مال مامحبة لمرة رفيق معتز جدا بخرز الحملة الايمانية  ومكلوبه عليه.. خالد الكهربائي كله للرفيق عمي اني سختچي وشغلي وكف وحولت على الخرز وهيه حالها حال الرزق يخطي ويصيب، جيب مرتك يمي واني افضه. يگول والحديث للمرحوم كعدت واني بوحدي وياها بالغرفة والرفيق يفر بالسبحه اليسر ويستغفر الله واني ارجف .. اول ماحطيت ايدي على راسه اجتني الرجفة من الخوف وهيه عاطت "قدوس قدوس" واردف... كلتلها طلعي سبحي وزوري الشيخ جنيد حتى تغيرين عتبه وبطلي سوالف الخرز ، بعدها طلعوه. ايگول  والحمد لله رجعت للعرگ وشغلي صار خير من الله باليدان يم سوگ هرج على لف الماطورات..