الى الاستاد احمد نوري المالكي مدير عام قسم العقارات في الامانة العامة لمجلس الوزراء
بواسطة والده دولة رئيس الوزراء ورئيس اركان القوات المسلحة ووزير الدفاع ووزير الداخلية ورئيس جهاو المخابرات الاستاذ الحاج نوري المالكي ابو استاد احمد وابو زوجة الاستاد ابو رحاب دامت افاضتهم جميعا
عيني استاد احمد مادام انت هيجي جاكي وبطل بروح الوالد ما تاخذ شوية شرطة وتروح لفلسطين ترجعلنياها؟
ترى فلسطين هم عقارات خو جنابك يدري كلها بيوت لاخوانك واخواتك الفلسطينيين وبالتالي هم تابعة لقسم العقارات واكو هواية اوامر تنفيذ من مجلس الامن بس كلها تخاف تنفذ لكن الاتكال عليك مادام ابوك يكول انت خوش تنفذ ما تاخذ قرارات الامم المتحدة وتروح وترجع بيوت ذولة المكاريد لاهلها ؟
بعدين جنابك خريج قانون واكيد تعرف بالقانون فالرجاء اخذ قوة من الشرطة لو من الجيش لو حتى من الحماية وروح والهوا بظهرك ورجعنه فلسطين بلا امر عليك واذا ما يصير زحمة عليك لو على الوالد لو الوالدة ترة صاير هواية ينتظرون الفلسطينين وما احد ينفذ لان يخافون وانت تعرف اسرائيل مشبجة وتارسة بطون مثل ما يكول الوالد اجلك الله بس انت ما عندك بيها تسوك وتمشي .
بالمناسبة البيت اللي انت اخذته من الشركة الامريكية بالمنطقة الخضراء وسديت الشارع لان تكول هذولة الشركات الامريكية كلهم جواسيس ترة دولة الوالد راح يروح عند الامريكان بعد جم يوم فبداعتي روح وياه اخاف يتجسسون عليه الامريكان ويعرفون شكو جوه ....
ها بويه استاد احمد راح ترجع فلسطين لو نكول لابو رحاب يتولى القضية ؟؟؟ ترة ابو رحاب هم كده ويكدر يركب شتكول استاد ؟
بالمناسبة ترة هواية يضحكون على خدودك لوتسويلها شفط شوية يمكن تطلع احلى وهاي موضع الخدود خليها بيناتنا وما راح نحجي بيها
ها استاد ترجع فلسطين وعقاراتها لو تصير زحمة ؟ لان الفلسطينيين ثبرونا من يوم سمعوا الوالد يكول انت خوش تنفذ وهم اكلوا راسنا ويكولون بلكد تكولون لاستاد احمد يرجع فلسطين اذا ما تصير زحمة .
مقالات اخرى للكاتب
