سالفة غمة كللش ، وعساها بحظك وبختك يا(مارك !!) ولك جا استحيت على نفسك !! ماتدري بينه احنه وادم عشاير والنكَز عدنه مايبات !! ومانسكت على اي (لايك) غريب . قبل اسبوع عبر طفل من كَروبنا على كروب الجيران !! ورايح معلق ومسوي لايك واكو وحدة من بنات الكروب جانت تغسل الهدوم ومامنتبهة والولد شافها وتسودن وسوى (لايك ) !! جا غير قامت القيامة !! الفيس بوك احتركَـ ، والمليشيات دزت اكَوامة !! يكولون اكو واحد يكتب خواطر ( وحب عمك ) و(حب خالك ) وخاطر من خاطر لازم يصير شاعر وهو الولد شاب ماشاب ...!! عفية لاتفتهومني صح ! يكولون راح يسوون مضيف الفيسيين ، وتكعد جماعة (رؤؤؤؤؤعة ) بمضيف (اي وربي !!) ويناقشون بؤرة التوتر الاقليمي عند هذا الشاب وسبب دياحته بالكروبات !! ، وراح يسوون قانون (بالسلف ) الفيسبوكي يوجب الحجاب على بنات الكامرا والدردشة !! حتى لايستعجلون والعجلة من الشيطان !! المهم ، اتفقت العشاير الفيسبوكية على ان (النكَز ) العذري جائز !! واللايك الاخوي ايضا جائز بس لازم يكون اكو محرم !! .. واللي ينشر قصيدة فيسية !! له عشرة امثالها في اقرب مهرجان شعري .. ومادام المحاكم ماتحترم تقاليد الفيسبوك و(نونة الخاتونة) فالعشاير الفيسية ايضا غير ملزمة بماتقوله المحاكم لاسيما ان للعشاير مليشياتها اللي تحب النكَز!! .. والبلد مقبل على انتخابات وينكَز حيل الماشايفها !! همزين اني من آل ازيرج والا جان ذبيت (زرج) وي آل اجيرش !! والكَروب سواجي !!
