من اكثر الامور التي نسمعها في البيوت العراقية وبالاخص في فصل الصيف هي سيمفونية الكهرباء التي تُعزف كل يوم , واليكم جزء من تلك السيمفونية الخالدة :.
شغل أبو المولدة .. لا والله بعده ؟؟
أي شغل حول الجينجوفر ..!!
فصلت ألجوزة ؟؟
الووو .. المولدة عيني فصلت الجوزة. مترجعها رحمة على والديك ؟
أي رجعت الكهرباء مال المولدة ..!
جتي الوطنية ..!!
أي الحمد لله جتي ..... طفت الوطنية ..!!
الوووو .. عيني ابو المولدة طفت الوطنية .. أتشغل لو لاء ؟؟
شغل ابو المولدة .
رجعت الوطنية ..!! طفت .. جتي .. طفت ..وأخيراً أنهجمت الوطنية !!
الووو .. ابو المولدة طفت الوطنية أتشغل لو لاء ..؟؟
ابو المولدة :ما أشغل لو يجي مدري منو شنو أني مضحكة كل شويه مشغل ومطفي.
يابة أيكَول ما أشغل .. زين خل أنشغل مولدة البيت الصغيرة .
ها بشروني اخر ألاخبار ..!!
المولدة الصغيرة يمكن (مختنكَة) لو البانزين مو زين بي شوائب ؟؟
ليش بس البانزين موزين .. الشوائب حتى بالرئاسات الثلاث .
اكو حل ليش متنامون .. احسن .. صحيح الجو حار ودرجة الحرارة عبرت ال 50 مئوية. بس ميخالف مو يكًلون الاجر على قدر المشقة ..!! خل نرفع شعار الاجر على قدر درجة الحرارة ..!! ناموا ولا تستيقظوا ما فاز الا النوموا .
وصرخ احدهم وقال ...
بابا بابا :اشو ذاك البيت متطفى بي الكهرباء ابداً ليش ..؟؟
عيوني: مو هذا البيت مال حرامي سياسي .والحرامية معززين مكرمين في العراق.
وطاح حظ الحكومة ورئاسة الجمهورية والبرطمان ..!! وكل الاحزاب ومن والاهم .
سلامات يا كهرباء .. اخ منك يالساني
