أحلى شي بالدنيا لما تگعد من النوم وأنت حلمان حلم حلو يبشرك بخير للمستقبل ..
تحس بنفسك منتعش ومستبشر خير ، وتبقى طول اليوم أنت سعيد ومرتاح وتتوقع بأي لحظة بأن الحلم اللي شفته راح يتحقق وتتغير حياتك للأحسن ..
أني البارحة حلمت حلم كلش حلو ويبشر بخير وگعدت من النوم كلش مرتاح وسعيد ..
حلمت اللهم أجعله خير ، بأن چنت گاعد على سجادة الصلاة ، بس چنت كلش مهموم وضايج ، وچنت لازم بيدي سبحة ورافع ايدي للسما وأبچي ، وأدعي رب العالمين أن يفتحها بوجهي ويوفقني ويرزقني المال والصحة ومن هاي الأمور ..
بقيت هوايه أدعي وأبچي ، وفجأه أندگ الباب مال البيت ، رحت على الباب فتحته ، طلع رجال چبير لابس أبيض بأبيض ووجها نوراني مثل الثلج ، وعنده لحية بيضة مثل الگطن ، أني من شفته كلش أرتاحيتله وگلبي أنفتحله ..
گال : السلام عليكم ابني ، أني خير الله سويلي طريق أريد أفوت لبيتك !!
أني كلش فرحت ومصدگت اللي شفته وسمعتة ، گتله : صدگ تحچي ، صدگ أنت تريد تفوت لبيتي ؟!!
گال : أي ابني ، أني خير الله سويلي طريق أريد أفوت لبيتك ..
أني گتله : صدگ چذب ، شنو أسويلك طريق قابل أنت غريب ، البيت بيتك أنت تفوت شوكت ميعجبك ، أنت أبو البيت وأحنا خطار عندك ، وگمت أصيح .. يا رحمتك ياربي ، الحمد لله ، الحمد لله
هو ابتسم وگام يطبطب على چتفي وفات للبيت ..
أول مفات للبيت گام يتلفت ويباوع يمين يسار وبالأركان وبالزوايه !!
أني گتلة : حجي على شنو تدور ؟!!
گال : ابني گاعد أدور على الميزانية مال مي ، أني خير الله موظف الجباية ، أجيت أشوف شگد صارفين مي هذا الشهر ، حتى أچبحك بقائمة معدله تخليك تتغطه زين من تنام منا وهيچ .
