البارحة چنت گاعد بالبيت وضايج أريدلي شغلة التهي بيها ماكو ، گلت أحسن شي خل أدخل للمخزن أنحبش ..
لان عندنه مخزن بيه هوايه قلاقيل ، لان أحنا منذب شي شكو شي يخرب يعتگ ، نشمره بالمخزن نگول يجي يومة ..
واللي يطب للمخزن يلگه اشكال والوان ، تكرمون نعالات لاستيك تك وتك ، صونده مزروفة ، فتايل مال چولة ، خلاط مي مكسور ، طوافة مال مبرده ، ماطور مال ثلاجة محروگ ، وكلشي وكلاشي عبالك سوگ هرج مو مخزن ..
وأني أحب بين فترة وفترة أدخل للمخزن وأگوم أنحبش بالقلاقيل وأسترجع الذكريات ، لان كلها شغلات قديمة تذكرني بالماضي ..
المهم گمت أگلب بالغراض ، طلعت نطاق مال جيش تذكرت أبويه من چان بالجيش الشعبي وچان يلبسه ويداوم ..
طلعت عوجيه قديمة وتذكرت جدي من چان طيب وكل شوية سايگله واحد بيها ومزورگ جسمة ، وعدت كل ذيچ الذكريات الحلوه ..
بعدين طلعت قوري كلش قديم ، شلته وتذكرت أيام ماچنه صغار ونشرب بيه الچاي ..
بس أنقهرت عليه لان چان مليان تراب ، جبت وصله وگمت أمسح بيه ودموعي گامت تنزل لان ذكرني بالماضي وأيام الطفولة ..
بس أثناء ما أمسح بيه أشو صارت حركة بالقوري ، أني بالبداية عبالي بيه فاره بس طلعت غلطان لان وراها گام يطلع دخان ، وفجأه طلع منه مارد چبير كلش !!!
أني ذبيت القوري وأنهزمت ، لان خفت حيل من اللي صار ..
هو صاح عليه ، گال : لتخاف تعال !!
رجعت عليه گتله : أنت منو وشنو وشجابك هنا ؟!
گال : أني مارد وأجيت أحقق أمنياتك ، وصاح : شبيك لبيك عبدك وبين أديك ..
أني كيفت حيل ، گلت هذا الله جابه اليه لان الصراحة أني مستوي كلش ومفلس وتريدون الصدگ .. أني دخلت للمخزن أريد أشوفلي شي بيه خير حتى أبيعه ..
گتله : شوف عمو مارد ، أني والحمد لله ممحتاج شي ، بس مدام أنت مصر تقدملي خدمة راح أطلب منك طلب واحد وهذا الطلب أگدر أحقق بيه كل أحلامي وأعيش ملك زماني ..
گال: گول ويجرالك ..
گتله: أريد أصير بالبرلمان ..
گال: بس هاي !! يمعود تدلل هاي أسويها باصبع رجلي الصغير ، أعتبر نفسك بالبرلمان من اليوم ..
بس گال قبل لا أحققلك أمنيتك ، شراح تسوي من تصير بالبرلمان وشلون راح تحقق كل أمنياتك ؟!!
گتله : راح تصير عندي فلوس هوايه ، وراح تصير عندي شركات ، وراح أخذ مقاولات ، وراح تصير عندي بيوت وعمارات ، وراح أعيش ملك زماني ..
گال : وبعد شراح تسوي ؟!!
گتله : كلشي بنفسي أسويه ، وشكو شي يسعدني ويسعد عائلتي أسويه وأمن مستقبلي ومستقبل عائلتي ..
گال : وبعد ؟!
گتله : هاهيه قابل شريد بعد وأصلا الطمع موزين ..
أشو هذا رأساً أنگلبت خلقته وگال : ولكم مو أگلگم متصيرلكم چاره ، مو اگلگم الاعوج يبقى أعوج !!
اني تفاجأت وگتله ليش عمو مارد ؟!!
گال : يعني تريد تبنيلك بيوت وعمارات ، وتصير عندك هوايه فلوس ، وتعيش عيشة ملوك من بعد ماچان كاتلك الفگر وماگلت هذا المگرود ابن المگرود اللي خلاني بهل مكان خل أبنيله مشتمل بأي چوله وأگعده بيه أحسنله من هل قوري الوسخ الگاعد بيه صارله سنين !!
بس مو صوجك ، صوج اليحترمك ويقدرك ويسويك أدمي ويحققلك أمنيتك ..
ولي من يمي وروح كمل دواره بالقلاقيل بلكي تلگالك بريگ قديم تروح تبيعه يافگر .
