من السوالف المهمة المضكورة بالكتب هي الاعمى والاعرج ، والعرب من زمان نوبات يستحون من المقابل فيسمونهم باسماء اقل وطأة على نفسيتهم ( صدك شنهي يعني وطأة ؟؟) المهم ، جانوا يسمون الاعمى بصير بس من يريدون يشتمون البصير يصيحوله : شبيك أعمى ؟؟ وهاي الرطينة من زمان !! بس بأيام النظام الساقط صارت رطينة جديدة وهي منع الالقاب التي تدل على عاهة !! وبوقتها كان العلامة محمد حسين الاعرجي له اعتراض بمنتهى السخرية حيث خاطب النظام الساقط بمقال يطالب به ان يكون محمد حسين (صحيح الساقين ) !! طبعا ، الاعرجي ماتفوته هاي السوالف وهو قاري كل الكتب وشايف كل شي مضكور بيها ، ويتذكر المتنبي وسوالفه على الاعمى والاعرج والاطرش (بس مو فريد !!) خاصتن (على لغة الفيس بوك ) البيت المشهور اللي يكول بيه (واسمعت كلماتي من به صمم ).. وبعدين حتى الأعور ماخلص من المتنبي ، يكولون واحد اسمه ابن كروس وجان اعور والمتنبي سمط ابو اللي خلفه لو كايله أعور هواي احسن .. يمكن المتنبي بذاك الوكت جان ارهابي !! لأن البيت اللي سمط بيه هذا الاعور يكولون بعد مايطلع له شعر العفو نظر !! شنهي ؟؟ بس لاتاهت السالفة .. بوية المتنبي كال لهذا الزلمة :
ويا ابن كرّوسٍ يانصف أعمى فإن تفخر فيا نصف البصير !!
نرجع لسالفة الاعرج .. العلامة الاعرجي استهزأ بالنظام الساقط وطلع خارج العراق واخو هدلة !! عاف هدلة دايحة وي مطشر وراح صك ابنه (عدي) وسواه أعرج ، وعدي دز رسالة لابوه وكال (وما على الاعرج حرج ) والفصل مالي لازم تسويني رئيس لجنة اولمبية .. اووووووووف .. النوب طلعت سافة ذوي الاحتياجات الخاصة !! اريد احلفكم بالعباس منو بيكم ماعنده احتياجات خاصة ؟؟ يعني الا تفضحونه .. الوادم كلها حايرة بأزمة المكان !! بالرواية العربية موعبالكم المكان مال !! بس لا افتهمتوني صح ؟؟ شكد عيب .. المهم ، ماعلينا بالوادم ، والمحتاج موعيب .. بس ظلت سالفة (الفيسيين ) يعني اصحاب الفيس بوك .. شو صاروا مثل سواق الكيا .. يكتبون بكيفهم .. اذا ابو الكيا يكتب (اخرب واتكهرب ) وينسبها للمتنبي وهو يدري احنه ماعدنه كهرباء مو المتنبي !! فمن حق الفيسيين والفيسييات يكتبون كل شي وينسبونه للاعرج ويشردون خاف وهم مطمئنين مايركض وراهم !! يابوية كلها مضكورة بالكتب بس سالفة (الارهاب الأعمى ) وكل شي يندل !! والقوات الامنية ماتكدر تكظ أعمى !! هاي صدك مامضكورة !! وينرادلهه (براعة) اختراع !! .. على صعيد متصل !! اتصل احد الارهابيين بعد ان تعرض لاصابة بعبوة انفجرت عليه بالخطأ بالممول الرئيسي له وقال له : ولك ... واسيني يا الاعمى !!
