اكو سوالف تمرد الواحد مرد وتشعل سلفه سلفاه , ليش وشنو معناته معلانه... غير كون الكبار يحجون لو بس صوب وصوب. وكَبل لانحجي عن القصد خلي اسولف عليكم سالفه زغيره....
هاي سنه من السنين اجانه بالسلف واحد ملّه يقره على الحسين وجابه على طاري امير المؤمنين وشجاعته, وظل يثرم بصل براسنه ,ايكَول علي سلام الله عليه من شلع باب خيبر شمره للسمه, وطار الباب , راح الباب ,رااااااااااااح ,عبر السمه الاوله ,وعبرالسمه الثانيه ,بس هم زين ماكَال كسر المسبار " هابل " لان بوكته محد جان صاعد للفضاء بس هذا الشيخ ورجل خالته ,وعبرالثالثه.. والرابعه .. كَلت هسه ايصيح كَوووول ,والناس اتكبر وتصلي على النبي ..
ما اطولهه عليكم عبّره للسمه السابعه واحنه كَاعدين لاناخذ ولا نطّي, انوب ماكف وسكت, ايكَول والملائكه الي بالدرب يدنكَووون من يوصلهم الباب ,اخر شي مشعول الصفحه وصل الباب للعرش " دخيلك ياربي" وختمه الفهيمه, وبعدين الملائكه صاحت دنكَـ ... دنكَـ ياربنه اجاااااااااااااااك الباب ,هذا مو باب طلع مركبه فضاعيه غير مأهوله, هسه انت شمدريك وصل الباب لهناك ياشيخ قابل كَرايبك يشتغل بالرسبشن مال العرش.
بعدين سمعنه المرجع ابوكَته من وصلته سالفت الباب كَايل جيبوه هذا الدجال اريد اشوفه... ومن بلغو صاحبنه ابو الباب الطائر شرد ومحد عرف بيه وين صار لان كَال السيد ايموتني اذا اروح !!!
... رباط سالفتنه العلماء شنو شغلهم ,غير ايوجهون الناس ويدلوهم على الصح والغلط والحلال والحرام يعني اختصاص دين وهدايه وارشاد لبناء مجتمع يقتدي بالنبي والصالحين من ال البيت سلام الله عليهم , لو بس كَاعدين ببيوتهم ومعتزلين الناس ومحد ايشوفهم, هاي هم سالفة النفط سالفه بس بعدين انسولف بيه مو وكتهه....مو هيج لو اني غلطان!!!
عمي الله وكيلكم اني احب المراجع واجلهم ,من باب همه ناس اكبار وتعبانين على ارواحهم بالدراسه ومن باب النبي اموصينه بيهم , هسه على الاقل المانعرف بيه شعدنه وياه ,نروح انسعله بالدين ونرد لاهلنه , واحنه اشو مهلسين يعني حتى خمس ماعدنه نطيهم ,بعدين كلنه وادم معدان ومامش مجان بالبرانيات لشجولاتنه,
بس شنو معناهه العلماء الكبار والزغار ساكتين الا قله يحاربون البدع والطراكَيع الطلعت النه بعاشورهاي السنين وطلع كم متخلف جاهل يكفرهم ويسبهم ويختل وره اسم الحسين والشعائر!!!
ناس تسبح بالجيحه مال المي الخايس وتلطم ,اواحد امطين من ساسه الراسه يهز بجتافه ويذب زركَـ على التراب كل شويه, جنه مكَول على برشلونه!!! وناس حاطه مي بنكره وتملغط بروسه, وناس ملبسين واحد قناع اسد وملتمين عليه ويبجون , عود شنو والله ....تشابيه , جا هي هيج , والله خيال مال دكَـ النجف.. وكله بكوم وجماعة البزاخه الي اتحولو صفاكَه للتيار السدري بكوم وحدهم ,وانوب كَلبوهه لطميات دكَـ وركص لايم الشعر الحسيني ولا بكَرباه , لان شعر اللطميه عمي مو هيج يختلف والطريقه تختلف والرتم هم يختلف ..
بس اني مامرد كلبي وصعد السكرغير واحد مصفط شعر راسه بدهن الراعي موديل(( وين النعال )) ويحرك بيده مثل المخنث من جماعة الايمو ويطووه اطووي اتكول حيه ممغوصه وهم عود لطميه, والقهرني اكثر يجيب طاري اسماء مقدسه تشرفه وتشرف عشيرته بخويطهم .
هسه سكتت الساده والمراجع على هاي السوالف شنهو معناهه.. مو ايكَولون صارت صحوه عد الناس وبدت ترجع للدين والايمان ,جا شو ردينه ليوره وصارت دجل وشعوذه وخرافات, مو كَبل جم يوم المعممين ادخلو بالحكومه وتشكيله من باب نصح وارشاد ورعايه ابويه .... خوب الشيخ النجفي كَتل روحه على تغيير الحكومه, وضربونه بوري شرعي ابو العجس, وبوكته حجينه وسبونه ولد ال .. حلال ,بس هاي السوالف الي تضر الدين وتشوه سمعة المذهب الشيعي , سكته يم حسن سكته ,ليش عود
جنه ماراضين على التطبير انوب طلعولنه سوالف الدي جي وفيديو كليبات وسوالف لايم الله ولا يم الحسين ... هسه اني المدوخني بس شغله وحده , الباب وين صار!
مقالات اخرى للكاتب
