هاي سنه من السنين صارت عدنه طلابه بذاك الصوب وصار لازم نطيح على عشيرة ال مطعون بعد مااخذنه من گليطهم عطوه, وچانت الوادم گبل اتسيّر بالهور بمشاحيف رباعية الدفع وكباريتنه وشيوخنه عده يو گعده يو شختوره ام الماطورغاليه بغلات الجكساره مال السيد... رچيچ الحال مثل داعيكم عده طراده ناچخ روحه نچخ بيه وحيدیته چنه ديچ هراتي تعبان على روحه... لو لايذ بكتار الشيخ بالگعده...

الحاصل رحنه وره صلاة الظهر وصارت وصلتنه يمهم بكسرت الشمس , وچان ويانه حجي زامل..هذا الزلمه طرگاعته طرگاعه... مانعرف ياساعه يتنحر بمچانه ومايتزحزح ابد وتعال جيب خلگ واغنعه ...

صارت نزلتنه شمرت عصه عن مضيف الشيخ...وبدينه نطبگ الشخاتير مالتنه وننزل وننكت برويحاتنه ونعدل بالبشوت والعگل لزوم البرستيج والاتكيت مال العشاير... لچن حجي زامل فاجعنه بموقفه غير المسعول وماگام من مچانه ,ظل گاعد مضهضب اتگول عتوي مدغمث بالتراب واوجهه مايگصه السيف!!!

ها بويه ماتنزل حجي.. گال لا مانزل....

بويه مايصير الوادم گامت انزل...

مانزل .... والعباس اگلكم مانزل...

احنه چبيرنه زلمه اشچ وخلگه خلگ حكومه ..گله بعد رويحتي حجي زامل گوم لاتفشلنه جدام المشتمع المدني ياعمي...

وروح چدك محفوظ ماگوم...

هاي شلووووون بلوههه..الوادم وصلتنه ولك گوم شهرتنه..

هسه لو تثلاث الدنيه ماگوم...

چا خوش ظل انته بالمشحوف واحنه شواي نگضي شغليتنه ونرد عليك...

رد گال مااظلش بالمشحوف ...

ها بويه شلون بلّه .... انرد لاهلنه وهاي الوادم هالگامت تتلاگنه ...

مالي شغل اني مانزل وماظل بالمشحوف...

انا غلام ابوي چا انته لاتضيف ولاتظل بالبلم!!! چا وين انوديك...

انتو روحو واني ارد لاهلي...

چا انت یا بويه صاحب الطلابه شلون ترد لاهلك لعب چعاب هوه ...

شيخنا بروح ابوك عوفني تره بس اچي وياكم اخرب عليكم شغل..

وعاد عمي خرب علينه بس هيچ ولك مو حرچتنه !!!!!. الجان الحايط يسمع حجي زامل يسمع...معناته يغاتي وهگنه وهگت البغله بالبريج.

السيد غايد القلع العالمي قرين روسو وفولتير قدس سره على كولة دعبول التيار ايذكرني بحجي زامل ... معاجب الرعيان سارحله بمطي ...لاهو ويه الحكومه ولا بالمعارضة ,لايحارب ولايسالم.. من طگت شغلة الفلوجه لهذه یوم الله وهو خانس ...شنهي رايه..ايهيچ ايظل بالبلم !!؟..يعتكف ماينعكف .ينسدح ماينبطح ....بس الله اليدري ..