اهلنه الله يرحمهم ويرحم والديكم جان بيهم طبع يسوي شلل اطفال ورجفه بالمناخير وشعواط بالاعصاب توصل ريحتهن لباب الشرجي ....ليش ..... لان كلشي ايسونه زين موش النه والفراش الزين موش النه واللكَمه الزينه موش النه, هالسمجه ....هاللحمه المشويه هم موش النه ,

النضده مالتنه الي جانت فوك البوفيه , اربعين لحاف ودوشكَـ وعشرين مخده بكافة الوان الطيف الشمسي وخمس ازارات وبطانيتين ام النمر من يغطونك بيه اتكول طابكًـ على هيفاء وهبي بسره فرن مال صمون ,

كل هذا جان محجوز للخطار واحنه فريخاتهم المكَاريد الغلابه على كَولة المصريين انام على فراش قديم يلّعب ستين نفس وكَولجي.

المخده جنه بلوكه مغلفه بقماش والكَطن صاير فصوص مجعمره جنه خشم الدمولجي , والجراجف لونه متغير الازركَـ صاير سمائي باهت والابيض صاير بيجي على تكريتي يميل للداعشي اكثر من الشيعي والاحمر صاير بنزركَي والاسود صاير رمادي على فلوجي مفخخ , ومن نسال جا هذا الفراش النظيف ليش ماتنزلونه ,,

ايكَلولك .... لا مايصير يمه يتوصخن .. بلله اجونه خطار شنحطلهم .. انحطلهم عبوه ...انحطلهم وجع ....بس بكَلبي اكَوله ,

هذا الطبع ورثته كباقي الفكَريات والامراض الشعبيه كفقر الدم والضغط والروماتزم بالجينات وهم ام كوكه الخاتون سوت نضده واصله للسكَف وايضا للطركَاعه الخطار الي مايجون الا بالمصايب والفواتح لو فصل لو عمامنه يجون بمعامله من العماره والبصره .

المصيبه الاكبر انتقلت هاي العدوه الكَشره الله يكفيكم الشر للسياسيين مال دكَـ النجف ,هذا يتبرع لفلسطين وهذا يودي للصومال وهذه يعزم على نفطات العراق للاردن , ويوميه وفد رايح وفد جاي وهلس بالميزانيه من غير الخرده الي تروح بجيوب الحبربشيه ,

عود كَلنه خلصنه من مشاريع القائد مشعول الصفحه خارج الحدود , تاليه صفت الميزانيه كله ببطون السياسيين سم وزقنبوت اي والله, والشعب بعده حياته كسافه واينام على مقرنصات العيساوي وعبعوب ,

وبعد ما غسلنه ادينه من الفليسات , طلعتنه دولة الاباحيه العدميه مال داعش , وربعنه عايفينه ورايحين ايدافعون عن فلسطين وعن اكراد سوريا وصارلهم جم اسبوع ياكوباني .... ياكوباني .. اني عبالي كوباني بجرف الصخر !!!! ..

جا همه البيش مركه ماهتزت غيرتهم على صلاح الدين , الموصل , الانبار .. بغداد ...... راحو لكوباني ... لا ياشوفينيين على هالدكَه

هسه لو كوباني يمنه احذانه ميخالف بيه باب وشباج , شو بذاك الصوب, واطفال سنجار وعوايل اليزيديين شمرت عصه عن خشومكم ... ومحصورين بالجبال حدر رحمة الدواعش الجلاب ...

عمي عود فكو ارواحكم من الارهاب بالعراق. وبعدين هدو على داعش وخلصو كوباني , ودير الزور , ورفح والقدس الغربيه وشعوب أفريقيا وامريكا اللاتينيه .. وحتى زمبابوي...

لو تريدون بس ولد الملحه المساكين طلي فدوه عن ارويحاتكم وعوايلكم .... بس مو صوجكم صوج حكومة المقبوليه,, ...