هاي سنه من السنين صارت عركه بقطاعنه يم المدرسه, وهدو بيت حجي فرهود على بيت زاير خلف بالبواري ام النت والتواثي(اچ اثريه) ثلاثيه الابعاد , ميدي ان مريدي, الي تنام بضلعه ايظل يطحر طحر وكَوه يجر نِفس, وصارت طكَه وطيح , استخدمو بيه كافة الاختراعات الشروكَيه من اسلحة الفشخ والزلغ المحرمه دوليا, لم تسفر المعارك التي استمرت لثلاثين دقيقة عن مصرع احد, ولكن مصادر مطلعه افادت ان مستشفى الجوادرغص بالمفشوخين والمدمايين,اما المفاصيخ والمكاسير فلم يتمكن المصدر من احصائهم لكن ونينهم وصل للطابق السادس كما ما ورد بالتقرير
الزلم الكبار چانت بس اتحشم وتصيح .. عيب ولك , ولك عيب عمك هاذ ... اخوك لاتضربه .. الله ايطيح حظكم , ومن وضعت العركه اوزارها وتواثيهه... رحت عله واحد من الشيّاب .. وسعلته عن شغيله دوختني بالعركه ...
ـ حجي شو ذاك اليوم ماشفتك كضيت ولدك بس اتصيح وهمه يطافرون على الوادم وطايحيلهم تبن , وين اليوجعك ,ضحك الحجي واستلقى على كَفاه ... وكأنه خنفسانه مكَلوبه...
ـ هاي وين لكَيته فريح؟
ـ هااااااا شو ضحكت حجي فرهود ؟
ـ بويه هي عركه وصارت... خو مو كلنه انصير خيريين وحواجيز ونچتّف وليداتنه ...غير اول مره نطلع حيفنه وبعدين عود نطيح عليهم ونصالحهم .... چا بعد خالك محد ايهابنه لو سكتنه عن حكَنه والوادم ما تشتري الساكت بعانه... ولابتكريت.... ونصير مكفخه للرايح وللجاي ...
ـ افااااااااا شلون مالكَفته هاي....
ـ عمي ابو كوكه سلامة فهمك . انت مالكَفته لانك رجال فقير وعلى نيتك ,ذوله شباب وبعدهم بحيلهم, خلهم يطفرون ويضربون حتى المقابيل مايستفحل علينه, والناس راح اتكَول الزلمه الچبير ما جان قابل على ولده ,بس ذولي شباب طايشين مايفهمون ويجوز مغرر بيهم من عشاير بيت خلاطي وآل شلموط... مو هيچ يو لا؟
كلام الحجي خلاني اسولف ويه روحي وافکر بحال الدنیه....چا صدكَـ احنه فقره ومنهه لله
هي عمي الخيريه مو بشت ولا عكَال وانحطه على روسنه ,الخيريه حچي معدل وسنع ومرجله وشهامه وكت الشده , والخيريه موش معناته اتذل روحك وتصير مضحكه لليسوه والمايسوه ,, وچلمة الحكَـ اتكَوله للزغير وللجبير, ومايهم لو زعل, واليزعل منك وهو غلطان ايطبه طوب وللجيير ,احسن ماراضي عليك وهو ايشوفك بعين الزغيره, ويشبّخ عليک اشبّخ,ويظل يضرب بولدك براحته من صوب ومن صوب ثاني ايكول احنه اخوان وتعالو نتصالح ونكف الشر, والكل غلطانه , ويوميه جيب الساده.. اوّدي المخططين وعزايم وتشريب ... والحكَ ربعك ..
لو ايظل يوميه فاتح مضيفه لشعيط ومعيط وجرار الخيط ويبيع نفط ابكيفه ويحط بجيبه... وبس تحجي ايصيحك ويطلعك غلطان وشوفيني ... وانت كاكه نازانم موسيبت اكراد والي سار بيهم..
هسه هاذه حجي فرهود مو المفروض ايصير مستشار رئيس الوزراء للطلايب والمشاكل المستعصيه ويعلّم هاي الخرنكَعيه بالحكومه شنو يعني واحد ايصير خيّر ومهيوب بس كون ياخذ حكَه وحكَـ الوادم المظلومه, ويفّهم عرب چول الي تارسه البرلمان بدون فايده ولا عايده.. ومايسون افلوس القوط اللابسينه شنو معنه السياسه... مو هاذه الشعب لبسكم وقندركم وسواكم اوادم مسعولين وزعماء وقاده ...وانتو ماتسوون ترس اذانكم انخال ... الله وكيلكم... غيركون تحافظون عليه وتحمونه من هاي الجلاب السايبه... بس شنسوي لقسمتنه الطايح حظه.. خلصنه من ابن العوجه طلع النه ابن العوبه
مقالات اخرى للكاتب
