صحيح ما محصلين شي من الموازنات المالية لكل السنوات الماضية .. ومراح انحصل من موازنات السنوات القادمة ايضاً .. بس صارت مودة تأخر إقرارها وأصبحت عذراً لتبرير كل شيء في العراق .. يعني مثلاً أتكَول ماكو أخبار جديد كَالك الموازنة لم يتم إقرارها .. زين العراق اشوكت يستقر ..كَالولك الموازنة لم يتم إقرارها ..أي مسؤول اتكَله اكو حالات إنسانية وتحتاج رعاية .. صفن وبعدها كَال والله منكَدر لأنه الموازنة لم يتم إقرارها .. تسأل ليش سبونج بوب سفنجة وبنص المي وميغركَـ .. جاوبك الموازنة لم يتم إقرارها .. زين فلانة ليش زعلانة ويا فلان .. لأن الموازنة لم يتم إقرارها .. زاهد اشوكت يحصل على بايسكل ..كَالوا الموازنة لم يتم إقرارها ..الحلوات ليش بس على الغوغل ..السبب الموازنة لم يتم إقرارها ..!! اكو وحدة راحت للمستشفى لديها ولادة كَالولها انتي بشهرچ لو شنو كَالت والله ما حاسبتها عدل لأنه الموازنة تأخرت ولم يتم إقرارها ..!! ساعة السودة والمصخة على الموازنة.. واني شنو حاركَ كَلبي .. بالعير بالنفير أشو شعاري .. دوماً وأبداً المفلس بقافلة الموازنة أمين .. وحفظ ابو خيمة الزركَة الجميع من حسد الحاسدين.. ونصيحتي للجميع كل واحد ايضوچ خل ايروح للحاج غوغل وهناك أيشوف العالم وين واحنه وين والفرق بين الاثنين ..!!
سلامات يا موازنة .. اخ منك يالساني
