اليوم اريد (اتضكر ) كاظم اسماعيل الكَاطع ، لأن الوادم ملتهية ومالها خلكَـ تضكر واحد من أهم اعمدة الثقافة العراقية وهو الشاعر الكبير الكَاطع في ذكرى وفاته ، وابو وسام اعرفه معرفة شخصية ، وجان دائما خايف ، وشابع خوف ، يفتقد للامن بعز الامن !! ، ويخاف على البلبل من القصر ويخاف على الرسام لأن الرسام دمه الصبغ ، وابو وسام يحب المدارس ويريد حتى الاطفال الميتين يكَومون من يكَول المعلم :(قيام ) .. مو كَالو قيام وليش ماتكَوم .. وبين الخوف والقلق والبلبل اللي لازم يقرا نشيد والناس الميتة من الجوع .. نشوف ابو وسام يكره النظرة الدونية من قبل المسؤولين اهل القصر واللوحة والحمايات والخط العسكري !! ويكول : هاي الناس شي تلبس كلبدون وشي كطع لبسها البرد والطين تاج العافيه مو ترس البطون ها كده الجتف عند المجانين اذا غاب الامان من اليشبعون يصير الزاد بالبلعوم سجين مو شرط الفرح عند اليلمون مريض النفس ما يشفه بملايين دنيا واخره نتحاسب شلون؟ مو كالوا عيال الله المساكين؟؟ تورطت لمن كلتها .. عيدك مبارك سعيد ؟ لملموني وطشروني وظال بس اصقل واعيد ادري بيه جروحك انته يا جرح عندك جديد ؟ بلبل بحنجرته شوكه تريده يقره لك نشيد؟ شلون يقرالك نشيد؟ .. رحمة الله على روحك ابو وسام .. بس كون يسمعونك اهل الجتاف الكبار ويبطلون من تصريحاتهم اللي حركَوا البلد بيها .. واحدهم حمايته فيلق وماعدهم شغل بس التصريحات وانتقاد الوضع الامني اللي اي تدهور يصيبه هو بسببهم .
