اكثر شي مضكور بالكتب هو المطر .. والوادم تكول المطر خير لأن شوارعهم مبلطة وماعدهم شراكة وطنية !! والمطر سالفته سالفة لأنه مضكور بالقرآن بس بالشر !! يعني المطر مو خير !! بس الغيث خير والوادم تستغيث بالخير دائما والفقراء شيفتهمون من المطر ؟؟ شو لابيوت تحميهم !! ولاشوراع نظيفة !! والمدارس كلها بيوت طين !! واني دايخ من اول يوم مطرت بهاي السنة لحد الان بالوادم اللي غركَت بوابل من المطر وكلما اريد اسولف اكول خاف مايفتهموني صح !! وهي هاي المرّة الوحيدة اللي اريد الوادم تفتهمني صح !! ماعلينا بالوادم .. بوية اكو ناس تقرا جرايد وتسمع وتشوف وكَالو هاي المضكورات ماتضكر الخيرين باليتامى والأرامل وابناء الشهداء وضحايا الارهاب الاعمى والـ (يشوف)!! جاهي بس مضكورات وسوالف جرايد ؟؟ حتى واحد من ربعنا يكول اكو عائلة فيها اربعة ايتام ابوهم كتله الارهاب واليتامى ظلو بلا سكَف يحميهم من المطر.. ماتشوفها هلبت مضكورة بالكتب ؟؟ واني هم ماقصرت !! رحت فتشت الكتب كلها وشفت ان الوادم بهاي الايام تسعى للاجر والثواب وتحيي مراسم عاشوراء الحسين ولأن الحسين مات من اجل كرامة الانسان فأكيد اللي يحبون الحسين العظيم يلتفتون لهالشعب المسكين ويخصصون جزء من المواكب لدعم المساكين والفقراء وينقذوهم من المطر .. بوية ترى جزنه من العنب نريد (خوّتنه) والخوة زينة وبكيف الله وابو الحسن علي كون يهديكم بهذا الشهر وتلتفتون للفقراء وماعليكم بالمسؤولين ترى عدهم مهرجان بشارع المتنبي ودخلوا باحذيتهم للمتنبي !! (اقصد بسياراتهم المسلحة مثل حيدر الملا وربع مهرجان السياب ) والشارع لايتعامل مع الخوف والحمايات هو بس للورقة والقلم . المهم ماعلينا بالوادم بوية انتم يااهل الاجر والثواب اذا مستعدين حتى ندليكم على المساكين وحتى نوفي الدين اللي برقابنا للشهداء ولضحايا الارهاب .. ها بوية ؟؟ شتكولون ؟؟ لاتنسون ترى الحسين (بضمايرنه ) . الله يرحم السياب .. يكول :
مطر .. مطر .. مطر .. مامر عام والعراق ليس فيه جوع .
