الله ايرحمه حجي مبارك مات وهو مايعرف ايصلي ومن ايطب للجامع ايخلي عبايته وعصايته بصفه ويتوجه للقبله, ومايكَول غير جلمتين جانت هي كل صلاته
" مبارك يعرف الله والله يعرف مبارك اعبيتي واعصيتي ", ويشيلهن ويطلع , بس شلون صار حجي , ايكَولون تحلم ايطوف بالكعبه ومن كَعد بعد ما قبل واحد ايكَول اسمه غير حجي مبارك ,
والناس هم اطته على مايه , شلون هسه عدنه سلابات لازم يصيحوله استاد وهو دجه دبل... ومايفرق بين العنجهيه والعنجريه, ولا بين بيتهوفن و بيت لفته
حجي مبارك باخر ايامه جماعته لحو عليه حتى يتعلم الصلاه الصحيحه وعلموه شلون ايصلي من الاذان لحد التسليم.... ويوميه يجي يمه واحد منهم ويصلي وياه ...
وره مده لكَوه ايصلي مثل ماعلموه بس مسوي تعديلات ستراتيجيه على الصلاه ابكيفه
ايأذن بالحوش , ويقيم بالمطبخ ,ويكبر بالهول , ويركع بالممر, ويسجد بالغرفه, وماطوله يمشي ... الخبزه رافعه , الماعون غاسله ,الوصاخه شايله ... وعلى هالسالفه الى ان يخلص صلاه ....
ايصير التسليم يم مرته الي كَاعده بالديوانيه اتصبله اكل ....
المصيبه جان ايسولف ويه الزايره بنص الصلاه .. الحمد لله رب العالمين .. ياهو مطيح الطابوكَات مال الستاره .... الرحمن الرحيم .... هلبت اتفطنون على شغله ..... ولا الضاليين .. مايفيد وياكم اعدل وارد ليوره .... الله اكبر .. اكَلج بيت ام سالم مارجعو القزمه....
ومات حجي مبارك وهو على هاي الحاله لاتبدل ولاتغير ولاقبل احد ايعدله لان راسه يابس وكلشي ايريده بكيفه ,
بالضبط مثل جماعتنه اليوم لاديمقراطيتهم مثل العالم والناس ولاانتخاباتهم , والفايز مو فايز والنائب مو نائب , والريس مو ريس , والسياسي مو سياسي , والضابط مو ضابط , والارهابي هم مو ارهابي ... شنهي الطركَاعه ماتفتهم
يعني كلهم يشبهون حجي مبارك تعلمو الديمقراطيه تالي وكت بس سوهه على مزاجهم ,
ومثل ما حجي مبارك لعب طوبه بالصلاه الي هي اهم العبادات وعمود الدين همه لعبوا طوبه بالديمقراطيه, وكرهونه بمفهوم حكم الشعب
وصارت لعبان نفس وخرط من هذا اليعجبك واذا مايعجبك طكَـ راسك بصندوكَـ الانتخابات, لان الدستور العراقي الجديد يكفل للمواطن حق الانتحار بالطريقه الي ايريده
مقالات اخرى للكاتب
