أكثر النسوان بأيام گبل چانت تستعمل البقچ , وچانت وين متروح المره تاخذ بقجتها وياها ..
بيوم من الأيام چنت العب بالشارع أني وأصدقائي ..
صاحتني مريه چبيرة بالعمر گالت : خالة متجي تشيلي بقچتي توصلياها لراس الشارع , مابيه حيل أشيلها ..
گلتلها : أي خالة تدللين , وشلت بقچتها على راسي وگمت أمشي وراها ..
بس هاي المريه گامت كل ساع تگلي أوگفلي هنا خالة بس خل أسلم على فلانة وأجيك , وتاخذ البقچة وتفوت لبيت من بيوت المنطقة , وأني أبقى أنتظرها بالباب ..
وبقت المريه تفرفر بيه من بيت لبيت وأني شايل بقچتها على راسي وأفتر وراها ..
وبوكتها دخلت على نص بيوت المنطقة , وكل بيت تدخل بيه تطلع منه وبقچتها کبرانه وثگلانه !!
آخر شي گتلها : خالة فضيها عاد مو إنكسرت رگبتي , شوكت توصلين لراس الشارع ?!!
گالت : أي خالة هذا آخر بيت بس أسلم عليهم وأطلع ..
أني وگفتلها وبقچتي على راسي , هي دگت الباب ..
طلعلها رجال شايب , گلها أنتي مو البارحة أجيتينه وأنطيناچ .. شنو هي يومية , يله أخذي إبنچ وروحي وبعد لتجين علينه !!
طلعت هاي المريه فقيرة , وماخذتني وياها تگدي بيه , تدگ البوب تگلهم أني فقيرة وعندي يتيم ..
ماعدكم هدوم عتيگه لهل يتيم الواگف بالباب ..
أمهات البقچ دگاتهن متتسولف , تالي عمري شغلتني مگدي وتلملم بجايم بازه براسي .. ياوسفة الوسفه .
