چانت أمي من تريد تخوفني تگلي إجاك الحرامي أبو دشداشة مشگگه !!
وأني مصدگ وبقيت خايف من هاي الشخصية الخيالية اللي چانت تخوفني بيها أمي طول فترة طفولتي ..
وچنت كل ماأشوف واحد لابس دشداشة مشگوگه أگول هو هذا الحرامي اللي أمي تخوفني بيه ..
وبقت ببالي كل واحد لابس دشداشة مشگگه أگول هذا حرامي ..
بس من كبرت إكتشفت بان أهلنه چانوا كلش طيبين لدرجة مچانوا يعرفون ويميزون بين الحرامي والمو حرامي ..
إكتشفت بان أبو دشداشة المشگگه اللي چنت أخاف منه هذا من أطهر وأشرف وأنبل الناس اللي نعيش وياهم لان إنسان كادح فقير يشتغل بالحلال ويركض طول اليوم حتى يحصل على لگمة خبز يتهنى بيها هو وعائلتة , وميهتم لمظهره لان عنده أهم شي أن يعيش هو وعائلته عيشه كريمه لا يبوگ ولا يأذي أحد ويعيش فقير بس مرتاح الضمير ..
وإكتشفت بان الحرامي الحقيقي يعيش بنعيم وترف ويلبس أفخر البدلات والأربطه ويصعد أحدث السيارات , والمشكله كلها تخاف منه كبار وصغار لان عنده فلوس ونفوذ ..
أهلنه گبل خوش چانوا لاگين شخصية يخوفونه بيها , هي الحرامي أبو دشداشه مشگگه , وچانت تعبر علينه لان چنا غشمه بس جيل هل وكت ميعبر عليهم شي ومفتحين باللبن ..
يعني هسه اذا أريد أخوف جهالي شگلهم ,إجاكم الحرامي أبو قاط حلو !!
تره صدگ مشكله .
