اليوم حطيت عقلي وي المربع الأول ، وردت بس افتهم ليش السياسيين يهددونه بيه ويخافون منه ، اني شخصيا ما اشوف اي مشكلة بالمربع الاول ، جانت بوكتها ماكو لاحكومة ولامحاصصة ولاشراكة وثنية !! يعني جان صدك مربع بمعنى الكلمة ، لأن كل اضلاعه متساوية ومايحتاج لا لقانون ولا لقاعدة !! ، والوادام ناس تفرهد!! وجان الرفاق البعثيين الاشاوس !! يلحون على ضلع من المربع حتى يصنعون مثلث الموت ، وبين ليلة ويوم ( مو اغنية سعدي الحلي ) ، صار المربع مثلث ، ومن صار المثلث صارت القاعدة لأن المربع مايحتاج قاعدة !! ، ما اطولها عليكم ، كل الاشكال الهندسية مضكورة بالكتب ، والعراق تحول على مر السنين من عاصمة العالم الى الامة العراقية الى القطر العراقي !! الى نصف قطر وربعين !! .. ومثلث الموت اشتغل بكامل قواه الاجرامية حتى يصير متساوي الساقين ويتساوى مع القاعدة ، بعض الناس تحب تتساوى وي القاعدة والحضيض ، والبعض الاخر مستعد يتعاون مع امريكا ضد القاعدة المسلمين الابرياء !! ولأن لكل قاعدة شواذ !! يومية طالعنا واحد (شاذ ماشاذ .... ماعلينا بالعالم ) كلمن عليه بامه !! ليش بفتح مكة .. المسلمين مو طلبوا من الكفار وكالو (كلمن ميروح لبيت امه ... ) شنهي لزكت بالامهات اليوم !! لابو حتى بنات طارق .. المهم هسة الناس مختلفين على حل الازمة .. البعض يقترح تشكيل مثلث اخر يشبه مثلث الحرس الجمهوري حتى يستند على القاعدة .. وحتى يصير مثلثين .. يعني مسدس .. حتى محد يفكر بالمربع بعد .. وناس تقترح نرجع لمؤتمر اربيل لأن المثلثين اذا نجمعهن تصير نجمة سداسية وتزعل النائبة !! .. واذا رحنا لمؤتمر اربيل راح نخلص من القاعدة لأن راح كل واحد يرضى بحاصل ضرب الطرفين يساوي حصل ضرب الوسطين .. ويموت الدوشيش على الطاولة المستديرة .. ربطت ؟؟ لولا ؟؟
