كلشي چان اله طعم ونكها بذاك الوكت ، كل أيامنا چانت حلوة بالرغم من البساطة اللي چنا عايشيها ..
مچان أكو هذا الكم الهائل من المنتوجات الغذائية اللي نشوفها هسه تارسه السوگ واللي تحمل أجمل الألوان والأشكال لكن للأسف مابيها أي طعم ونكها ، بالضبط مثل الزمن اللي هي بيه ، واللي عايشيه أحنا هسه ..
گبل ماكو بيت عراقي چان يخلى من ( شربت نادر ) هذا الشربت الصغير بحجمة والكبير بطعمة اللي فعلا يستحق أن يكون إسمة نادر ..
وأحلى شي بهذا الشربت من تشربة وأنت راجع من برا تعبان وعطشان , بلحظه تحس بإنتعاش وكل التعب يروح منك ..
أتذكر بيوم من الأيام أجيت من المدرسة كلش تعبان وعطشان , دخلت للبيت لگيت أمي محضرتلي كلاص شربت مجرش , خالتلياه بالهول ويمه ماعون كليچة لان أمي تعرفني أرجع من المدرسة عطشان وجوعان , فتحضرلي هيچ نمنمات لان تعرفني أحب هاي السوالف ..
أني من شفت الشربت والكليچة كيفت حيل , ذبيت جنطتي وگعدت على القنفة وخليت رجل على رجل وگمت أمزمز بيهن .. أخذلي كمع شربت .. وعضة كليچاية ..
أخذلي كمع شربت .. وعضة كليچاية , وحسيت بنفسي سلطان زماني ..
وكمت كل ما أخذ كمع أصيح .. الله لذيذ..
أخذ كمع وأصيح .. الله طيب ..
أخذ كمع وأصيح .. الله منعش ..
لحد ماأخذت آخر كمع وصحت ااااااخ الله !!!
لان إجتني كفخة كلش قوية على علباتي من أبويه ..
گال : ولك شبسرعة شربت الشربت مال الرجال ياأبو نفس الدنيه , هسه من يطلع من التواليت شنگله?!!
طلع عدنا خطار وداخل للتواليت وهذا الشربت وماعون الكليچة خاليه اله ..
وأني أكووول أول تالي أهلي يحترموني ويحضرولي كلاص شربت حتى أريع گلبي بيه .
يعني صدگ الواحد لازم يتأكد قبل ليقوم بأي تصرف تحسباً لأي كفخة غير متوقعة.
