تعال بابه جيب المسطرة وقلم الرصاص .. وفد كارتونه چبيرة ... حطها هنا عل ميز
أي ! هسه ارسم فد ثلاث او اربع شوارع .
أيباه !! ماشالله على هل دماغ شكرا ربي .
هنا نحط مجمع سكني .. عمارات او فلل . بعدين نقرر . بهل فراغ نبني فد كم مدرسة
وهنا نحط مستشفى عالمي لابنائنا خطية . هاي سهله .. غرف اطباء وصالة انتظار وفد صالة للعمليات .
وما ننسى التقليل من حالة اختناقات الطرق نبني شوية مجسرات تمتص الزخم . هذا مجسر .. وهنا واحد لاخ . ايييي ! خوش مجسرات و زين عرضها .
مولات لازم نسوي . أخ ! شمحلاها لمن الناس تتسوگ من المولات .
يللا .. اعلنوا المناقصات وبعدها نسوي اجتماع ويا المقاولين .ولا تنسون تساعدوهم بالآليات الموجودة بدائرتنه اذا احتاجَو.
بعد سنتين
اليوم افتتاح هذا المنجز العملاق .
بعد اسبوع على افتتاح المنجز العملاق
☻أستاذ الشوارع بدت تتخسف والازدحام خله شرطة المرور تفقد السيطرة.
:- ليش ماكو ترافك لايت ؟
☻..........؟
☻☻أستاذ المدارس طلعت ما بيها مختبرات ولا ساحات رياضة ولا غرف اساتذة والشبابيچ تعبر هوا وتراب .
:- ..................؟؟ هسه بعدين المختبرات .. والاساتذة يگعدون يم المدير لما نشوف چارة.
☻أستاذ وصلت اخبار من المستشفى العالمي ان التصميم ما بيه لا صيدلية ولا مختبر ولا اشعة .
:- انتو اكبر ثولان . شلون تبنون مستشفى بدون هل مستلزمات ؟ يللا سوو ملحق وبهل وقت يشترون من صيدليات الاهالي والتحاليل همين بمختبرات الاهالي . مو غاليه اسعارهم .
☻ أستاذ نسيت جنابك البنية التحتية للمشروع العملاق ؟
:- قصدك المجاري وخطوط الكهرباء ؟؟ اذا هذا قصدك ..قدم مقترحك .
☻☻☻أستاذ ! فضيحة كبيرة ما ينستر عليها .
:- شكو بعد هل صخام اللي سويتوووه؟؟؟
☻☻☻أستاذ المجسر العملاق ينتهي مباشرة عند خط سكة حديد وهذا خطرعل ناس .
:- أسكت ولا كلمة ! وگفو شرطي مرور يقطع الطريق لمن يجي القطار . وحالا تروحون تشترون شيلمان وصفايح حديد ثخين حتى نسوي سكة قطار معلقة. شنو رايكم بهل حل ألعبقري ؟؟ خلصتكم من الفضيحة .
أحمدك واشكرك ربي عل هل نعمة.
خابصينه المهندسين بسوالفهم العتيگة ... على اساس تخطيط المدن لازم شركات مختصة . مو عيب نستغني عن خبراتنه الوطنية ؟؟ هذي اكبر خيانة للبلد اذا سويناها .
جيبولي فنجان گهوه .
مقالات اخرى للكاتب
