كتب ــ رسلي المالكي: ابعث لك هاي الرساله و انا افيض بك فخرا و اعتزازا لان بيضتي وجه فلاديمير بوتين .. و انشالله تبيضين وجهي من تقرين الطلب مالتي .
اني مواطن عراقي ، قدمت لكم مليارات الدولارات في السابق مقابل دباباتكم و طياراتكم اللي جنت اضرب بيهه اعداء العراق ( اللي حاليا ديحكمونه ) .. يعني مقصرت وياكم دفعت الكم كومه ، و اليوم اجه الوكت اللي احتاج وجهج الطيب و وجه بوتين الخير بي ، و ادري بيج متقصرين ، و الفودكا مالتج ماشربها اذا ما تلبيلي طلبي .. و ادري بيج بنت حموله و متقبليهه .. اصلا سمعتج و اني بعدني باذربيجان تصيحين ( ابشر يل اخو ) ...
يا بوكلونسكايا العزيزه ، اليوم ما ظل لي مكان ببلدي العراق ، لان الربع رجعوا همه همه .. ادري بيج شراح تكولين : انتو رجعتوهم .. اي احنه رجعناهم بادينه همين .. بس اني جاي دخيل الله و دخيلج تلفيني يمج و اني اعاهد الله و الوطن روسيا و القائد الرمز فلاديمير بوتين على ان اظل سيفا مشرعا بيمينه الكريمه ، في ظل باني مجد القرم جنابج المفدى ، حفظج الله و رعاج ، و نصرج على امة محمد نصرا عزيزا مؤزرا عاجلا غير اجل ، و ان يخليج خيمة فوك القطب الشمالي و يبعد عنج شر اوباما و الناتو .
و اعاهدج اني راح ادعيلج من كل كلبي كل احد بكنيسة سان بترسبرغ و اروح الهه مشي و اضرب زنجيل و اخذلج مراد حته يحفظج من شر ابن ادم و من اولاد الحرام و الادبسزيه .
هذا العندي .. و ذبيت اعكالي على ميزج و انتي بعد بكيفج ..
المواطن العراقي
رسلي المالكي
