بله سلام بله كلام و جايك هادود .. و لاف شطفتي على راسي و محرب .. ولك بيوم الصخمتوا وجوهكم و هجمتوا الاول و التالي ... شحصلتوا انتو و احنه شحصلنه ؟؟ عمي احنه ناس ما نريد الديمقراطيه جا كوه ؟ ديمقراطيتك اذا احسب هسه الوادم الماتت من وراها و افصلك عله كل واحد مربع انته و بوش ثق بروح ابراهام لنكولن تطي امريكه و البيهه و تظل مطلوب .. كاعد هناك انته و العالم صايحه الداد من وره تحريركم .. البلد صار افخاذ و جتاف و العالم بالشوارع مجطله علمود انتخابات سويتولنه .. و شلون انتخابات ؟؟ وين المكرضه الفار اجانه يحكم .. و وين الدوار و العتاك لبس قاط و صار بالبرلمان .. انوبه الحاكم لا الله جادرله و لا عباد الله جادرتله من يجلب بعد ما ينطيهه .. جا شسوينه ؟؟
الجان كبلهم نفس الطركاعه .. و الاجانه بجالكم بعد اطكع .. اقلها العالم جانت تتنام ببيوتهه مامنه .. محلفك بيمن ؟؟ بروح جورج واشنطن .. هيه هاي الردتهه انته و وبوش ؟؟ ذبيتلك 5000 واحد مجاتيل بالعراق و طلعت .. شحصلت انته و احنه شحصلنه ؟ عمي الله بالخير عليك .. ردناكم عون طلعتوا فرعون .. خلصنه من البعث اجانة الانكس منه .. و شلون حريه عدنه اليوم ؟ داعش طردت المسيحيين .. و البعثيه هجمت محافظتين ... و الحكومة شبعت بيوت الوادم براميل ..
شاكول عليك بريمر .. كونك بمرض لعنة العراق .. سامع بي ؟ مرض طك جنود امريكا الشاركوا بحرب التسعين و صار بيهم جرب من وره اليورانيوم .. هوه هاذه دواك .. بيوم حليت الجيش و خليت المايشتري يتفرج عله موتانه .. بس مو صوجكم .. صوج الجماعة الجابوكم .. جماعة بالروح بالدم الصاروا يصيحون بعدين يا حسين .. الذبوا الزيتوني و لبسوا عمايم .. الصفكوا للقائد الضرورة و هسه طلعوا متضررين سياسيا .. هاي عليمن ولك ؟؟ احنه اقروده ؟؟ اي والله عمي حقك .. لعد شتريد اكلك احنه شعب يحب بلده ؟؟
اوباما .. و السماك اوباما .. كون الله المنطيك مره جنهه نايب عريف تلكفك مسوي مكسورة .. و تحط عليك بربد مال كرك ووين اليوجعك حته تعرف الله حق .. و تحس بالعالم الشبعت كتل على ايد المليشيات و القاعدة ..
حضر عمامك .. اني جايك و اريدك فارش كون و محضر المعازيب .. مو علمود افصل .. بس رايد لجوء اذا تكدر تدبرلي .. لان العراق هجمتوه بعد .. بس كون عاد متقصر بالكرين كارد ..
نرفع الزحمه !