خطية العراق

احتفالات عيد الام .. والام محترك كلبها على وليدها اللي احترك بتفجيرات الثلاثاء، عيد الشجرة ، يا شجرة التحتفل والناس مهمومة ، لو بالمقابر الجماعية والمقابر كل يوم تنعاد بشكل وبلون .. خطية العراق

شلون بالله

خل نفتهم بالله ، السيارات اللي انفجرت ذاك اليوم ، اجن من السما لو طلعن من الكاع مثل الفطر ، لو اكون ناس فخختهن ونقلتهن وفجرتهن ، اذا اكو ناس اشتغلتهن واعتقلوهم .. بعد كم يوم يطالبون بيهم المتظاهرين ويطلعوهم .. اشلون بالله

كبر طمك

مرشح واكف بمكان الانفجار يتصل بمسؤول حملته الانتخابية بالتلفون يكله : اكلك بقن عندك بوسترات ؟ لان هذا البوستر احترك بالانفجار ، وهاي المنطقة راح تجي هواية ناس بيها توكف تشوف مكان الانفجار وهم تشوف صورتي ورقم القائمة .. جا غير كبر طمك

ابو الكوستر

بمدينة الصدر احتركت كوستر كامله بعبريتها ، انفجرت يمها سيارة مفخخة ، ماتو كل البيها الله يرحمهم ، السايق شاب جان المفروض عرسة يوم الجمعة ، صار الجمعة الثالث مالته ، الله يرحمهم جميعا .. شلون بلوة ..

احصائية دامية

يكولون الانفجارات اللي صارت بالعراق اكثر من كل الاحداث الدامية اللي حدثت بالعالم كله قاطبة ، بيوم واحد ، ببلد واحد ، بطائفة وحدة ، والناس الضحايا ، اطفال ونساء وابرياء وشيوخ .. شنو هاي شجاعة ؟ حرب ابادة ؟ شيسموهه وبس تحجي يكولون عليك طائفي ..