كثُر الحديث وتعددت المسميات التي تطلق هنا وهناك .عن ألأمير الفلاني لتنظيم مسلح أو غير مسلح أو حتى تنظيم (مصلخ) حتى وصل عدد ألأمراء رقماً قد يفوق عدد جنودهم . وعليه فكرت قليلاً مع نفسي بأن أسوي مملكة .وبالطبع مملكة أفضل من ألإمارة لأنه واسعة ومتعددة .وهنا أعلن لكل العالم عن تنصيب نفسي ملكاً على مملكتي وشعبي الذي سوف يكون أسعد شعوب الكون .وعلى عناد الجماعة خليهم يموتون بحسرتهم . وهذا المملكة ما بيها لا وريث ولا نائب ولا هم يحزنون لأني أعمل تحت شعار (مملكتي والعب بيها شله غرض بينه الناس) شعليكم أنتوا أني الملك واتصرف بكيفي ..!!
وشروط العيش بسيطة جداً . العب وفرفرش وهيص براحتك حتى مسموح تنطي (لايك) طبيعي وسوى( كومنت) مع من تحب . اكتب وانتقد براحتك المملكة وحتى ألملك . وراح اسويلكم جوازات سفر كلها حمراء ( دبلوماسية). ومنح مالية كل راس شهر . والي ميكَدر يزوج أنطي منحة مال زواج . بس أذا جاني بعد شهر وكَال أريد أطلق وانفصل لأنه ما مرتاح اسمط جلده لان الزواج مو لعبة.والمرأة بالمملكة محترمة راح اخلي كل الوزراء من النساء والمستشارين . لان الرجال بصراحة خربوا الأول والتالي . والدليل وضع العرب اليوم يقودهم الرجال إلى التهلكة وبامتياز ونجاح ساحق .
أحزاب ماكو .. لأنه راح يطلعون كم (عفطى) يشلعون كَلوبنه بالعنتريات والشعارات والقال والقيل ونرجع نعيش وضع تعيس وبالأخص الاسلامجية .لانه هسه يكَلون ميصير ملك لازم نسوي مجلس شورى هو ينتخب وهنا الكارثة اذا كَعدوا أثنين ميتفقون النوب هذا المجلس أشلون راح يتفق .لو يجيك واحد ويكَول انريد يرجع الحكم للخلافة , بس اريد أعرف الخليفة مثلاً أشلون راح يتنقل على الحصان ..!! فعليه كلا للأحزاب . ألعلاقات مع كل العالم ماكو دولة عليها خط احمر واصفر واخضر لأن شعاري( البي خير يعبي بالسكلة ركَي) مو يبقى يهوس والناس كتلها الجوع والقهر . سفارات بالخارج ماكو , لان كل مواطن هو سفير بحد ذاته . وليش سفير وصرفيات وفساد .. أشو الناس مرتاحة ومن تسافر تتصرف بلطف واحترام . لأنه شبعانة من كل شيء ..!!
جيش رمزي بس علمود البروتوكولات مال الزيارات.لأنه أريد أفتهم يا غشيم يفكر فد يوم يشن حرب على المملكة مالتنه بوقتها راح الشعب كله يوكَف بوجه أي واحد تدني نفسه موكَتلكم شعب شبعان ومرتاح مينخاف عليه ..!! وهم نخلص من الخطط ألامنية والقادة الفاسدين وعسكرة المجتمع على الخالي بلاش ..!!
الخدمات موجودة كلها وفي باب كل وزارة أخلي بالكَاع صورة مسؤول عراقي فاسد حتى الموظفين من يدخلون يدوسون عليه ويتذكرون هذا حال كل واحد ما خدم الناس وقدم ألهم الخير . وكل واحد ترك ضميره خارج نطاق الخدمة ..!!
واني كالعادة كَاعد بالقصر أناقش أمور المملكة مع المستشارات والوزيرات . لأنه لازم أتابع كل شيء بنفسي . ومرات من أضوج من حقي اخذلي (فره) داخلية لو خارجية أغير جو هم حقي قابل صرت ملك وابتليت بيكم وبس ..!! أروح أصيف امدد على شاطئ أشوف الحديثات وأتبادل الزيارات الرسمية مع الملكات أولا ومن ثم الملوك والرؤساء في العالم . وجائز تفرج وأزوج كم ملكة حتى لو بأخر العمر المهم مصلحة مملكتي اولاً وشعبي الجميل .
ويا ويل كل واحد فد يوم أشوفه او أسمع مشتري حتى ( قوانة) فارغة مو رصاصة .. ممنوع السلاح مهما كان نوعه . والي أيحب الصيد عاتي جداً اكو مكان خاصة أيروح يستلم بنادق صيد ويتونس ويعيش الروشنه ومن يخلص يرجعن النفس المكان .
ملاحظة : على من يجد في نفسه الكفاءة للعيش في هذه المملكة تسجيل أسمه ودفع مبلغ ( مليون دولار) عداً ونقداً .. من اجل المباشرة بالحياة السعيدة ..! وقبضوا من دبش .. راح نكَضي العمر كله بس نحلم والبوكَـ والقتل والنهب واصل للستار ..!!
سلامات يا مملكة .. اخ منك يالساني
