هاي الكتب طركَاعة .. كلشي مضكور بيها ، كَلت اليوم احرجها وافتش عن وثيقة الشرف .. ولكيت سوالف وطلايب شكثر .. اول طلابة هي ان الشرف مايحتاج وثيقة !! واذا كان لابد من وثيقة جا ليش يوقعونها بعد عشرة اعوام ؟؟ يعني معقولة كل هذا الوكت كانوا يكتبون بيها .. ثم ان الشرف كما هو مضكور في الكتب مرّ بمراحل عدة !! ( صدك العدة هم لها علاقة بالشرف ) ، ماعلينا ، من المراحل اللي يمر بيها الشرف هي مرحلة النزيف المستمر
لايسلم الشرف الرفيع من الاذى
حتى يراق على جوانبه الدم
يعني ، اهم شي جوانبه !! اذا صارت حمره من الدم ,, معناه الشرف بخير ، ويكولون اكو زلمة خوش ادمي يكَول :
إنّا لقوم ابت اخلاقنا شرفا
ان نبتدي بالاذى من ليس يؤذينا
بس الشعب بقى حاير ؟؟ ويسأل : يعني وثيقة الشرف بس لاتتضمن عفو عن طارق الهاشمي والعلواني .. واحتمال تشمل مطشر اللي جرّد الشعب من كلمة شرف ووصفه (بالدايح )
.. الشعب اغلبه مامقتنع بعمل البرلمان ولا باجازة الامومة مال العلواني ولا بتغليس الحكومة عن التهديدات الامنية واستهتار النواب وتماديهم بشتم الشعب .. باختصار الشعب يكول : النواب مايشتغلون وأحدهم يكول علينا (دايحين ) !! واحنه تعلمنا من النظام (الساقط ) عملك شرفك .. من لايعمل لاشرف له !! يعني خمس اعضاء الرلمان الذين لم يحضروا جلسة واحدة .. لاشرف لهم وفق المعيار (الصدّامي ) !!
اما المتنبي فيحجي من ورا خشمه .. لأنه واثق من شرفه
ما أبعد العيب والنقصان عن شرفي
انا الثريا وذان الشيب والهرم
................................ لابشرفك !!
عامر الشويلي 
22/09/2013 - 02:17
البداية
السابق
