من المضكورات بالكتب ، يگولون اكو مدينة بالمستقبل يعني بعد 70 الف سنة يبنونها وهاي المدينة تسبب قلق لكل الحكام ، ماعدا الحاكم اللي بناها ، لأن خطية مالحگ يقلق ، كتلوه البعثية وجمال عبد الناصر مال بعد سبعين الف سنة .. المهم چانت هاي المدينة قبل اسبوعين من يوم القيامة عدهم امتحانات مال نهاية القرن !! وچان واحد من الطلاب ذكي جداً واسمه (غاسم ) وچانت الاسئلة صعبة جدا والسؤال الاول هو منو بنا الثورة ؟.. كل الطلاب ماجاوبوا ماعدا غاسم ظل يصيح ست ست .. اي غاسم منو بنا الثورة ؟ ست عبد الكريم غاسم ، زين منو سماها الثورة .. ست عبد الكريم غاسم ، زين من مات عبد الكريم شسموها ؟؟ كل الطلاب سكتوا .. وصاح غاسم .. ست (الرافدين ) .. زين بالغادسية الثانية شسموها : ست مدينة صدام .. منو يكدر يكولي منو صدام : ست اخو هدلة !! .. ولك هدلة منو ؟؟ ست صدام مات ومحد يعرف منو ابو ليش تسأليني عن هدلة ؟؟ ولك انت كلشي تعرف .. زين وبعدين شلون صارت مدينة الصدر ؟ ست اجه زلمة سبع بذاك الوكت وتحدى اخو هدلة !! وانت تعرفين الثورة اسم على مسمى .. ماتسكت وشواعها مليانة (چوادر) وحتى عزرايين يكولون بيتهم يم ساحة مظفر !! ولك انت منين تجيب هذا الحجي ؟؟ اي وشنو علاقة حـچيك بالجواب ؟ ست هذا الزلمة اسمه محمد صادق الصدر وهذا من طلع كل اهل الثورة ناصروه ومن استشهد بعد شسولف .. عمت عيني على طركَاعة جامع المحسن !! جا غير صارت مجازر !! زين وشنو اخر شي صار بيها ؟ ست اخر شي طلعت ناس (سرسرية ) يسمونهم نواب واحد مطشر حشاج والثاني اسمه احمد العلواني ومطشر كام يفشر عالشعب والعلواني يهدد بالشعب .. والبرلمان والحكومة چانت عدهم طلابة (شرف) ويريدون يتحالفون .. وطگت المفخخات بالفاتحة بنص شارع الفلاح وانترس شارع الفلاح (چوادر) !! .. وهسة شنو وضعها .. هسة ست .. كلشي تغير .. وخلصت الثورة من كل القتلة وخلصت من العراق .. وسكنت هنا لوحدها لأن شعبها في تكاثر مستمر وهنا الوادم مايعرفون عربي .. لذلك كلهم يصيحولها : (Alkoader city) يعني مدينة الـچوادر.
