اكثر المضكورات بالكتب هي المقدمة ، والمقدمة دائما يكتبونها بالأخير !! يعني مؤخرة ثانية !! وسالفة المؤخرات لها علاقة بما يجري في مصر ، لأن المصريين اعترضوا على فيلم عمرو بن العاص لأن الفيلم له علاقة بالمؤخرة !! غريبة جدا سالفة المؤخرة !! الوادم كلها حايرة بالمؤخرة وعايفة المقدمة !! حتى اني صار شهر اريد اسوي عملية (...) والطبيب يكول لازم (الصدر ) مالك ينظف من الدخاااان حتى تتحمل تخدير عام .. وبقيت بين انظف (الصدر ) لو (اعالج المؤخرة ) .. البواسير لادين لها ، وهي مرض يخجل وتكاليفه غالية !! بس بالمعارك والحروب الناس تشرد من المقدمة وتلوذ بالمؤخرة !! يعني لو ما المؤخرة جان ماكو لاعمرو بن العاص ولامصر ولا سيدنا معاوية ولاسيدنا يزيد .. اللي كتل سيدنا الحسين (سهواً) !! يكولون المؤخرة مال عمر بن العاص مضكورة بالكتب .. لأن قبل اسبوعين واحد من جماعة احمد العلواني ينادي جيش الـ (نصرة من .... البصرة) ! وينادي (اخوات) المسلمين.. بمصر ويكول : يا ابناء عمرو بن العاص .. بوكتها اني جنت اتمشى بالثورة .. ومريت بشارع الفلاح وشفت الفاتحة وشلون الوادم ادخلت الموت عصر مابعد الحداثة يعني فاتحة بداخل فاتحة .. وجبناها عالدولة والحكومة وتهديدات العلواني ودموع طارق الهاشمي على جيش النصرة .. والتفجيرات والخروقات الامنية .. والسوالف تدوخ .. يكولون السياسة فن !! والثاني يكول السياسة عاهر ، واحد من جماعتنه يكول : بعد راح تشوفون تفجيرات وضيم وقهر ، مادام ماتعرفون تردون الموت وتحتمون منه مثل مايحتمي منه احمد العلواني ومطشر .. فصرخ واحد صاحب اربعة اطفال شهداء بشارع الفلاح وكال :
هو المَـوتُ، فاخْتَـرْ مـا عَـلا لـكَ ذِكْـرُهُ
فلـم يَمُـتِ الإنسـانُ مـا حَيِـيَ الـذِّكْـرُ
ولا خَـيْـرَ فــي دَفْــعِ الـــرَّدى بِـمَـذَلَّـةٍ
كـمـا رَدَّهــا، يـومـاً، بِسَـوْءَتِـهِ عَـمْـرُو
................................. لايابه مطشر !!!
