طبعاً الف الحمد لله والشكر البارحة الله نجاني من محاولة إغتيال , وطبعاً ببركة دعائكم الدائم اليه ..
أني عبالي بس اللي عنده شي يغتالوه , طلع حتى اليمشي بدربه وماعنده شي هم مخلصان !!
البارحة بالليل أثناء رجعتي من الشغل مشيت بشارع خدمي يمنه يومية أمشي بيه واني راجع للبيت ..
بس المشكلة هذا الشارع ظلمة ومحد يفوت بيه بالليل !!
المهم أثناء ماچنت أمشي بيه , شفت سيارة جايه بإتجاهي تمشي على كيف ومطفي اللايتات وبصف السايق واحد ماد راسة من الجامه وشايل مسدس وموجها عليه !!
الصراحة الموقف مريب , والواحد ميعرف شلون يتصرف بساعتها لان يشوف نفسه بينه وبين الموت شعره ..
المهم ماأدري شلون اجتني فكره انه أنبطح بالگاع , وگلت تبقى على الله بعد ..
إنبطحت بالگاع وگمت أتشاهد بصوت عالي وگمت أسمع صوت السيارة وهي تقترب عليه شوية شوية , وگمت أنتظر صوت الطلقة اللي راح تنضرب عليه ..
بالأخير السيارة وصلت يمي , السايق شافني مبطوح بالگاع چان يطبگ عليه ونزل من السيارة ..
گال : خير أخي خو مابيك شي ?!!
أني رفعت راسي , چان تطلع مريه اللي تسوق مو رجال ومگعده إبنها بصفها وبيده مسدس أبو الصچم !!
أني بوكتها تمنيت الگاع تنشگ وتبلعني من گد الفشلة ..
..
المهم من گلتلي شبيك أخي خو مابيك شي , أني رأساً بدلت وحاولت الغمط الشغلة , گمت أمرغل بنفسي بالتراب وأبوس بالگاع وأبچي وگلتلها : لا مابيه شي أختي .. بس أني هستوني جاي من الخارج ومشتاق لتراب الوطن .
مقالات اخرى للكاتب
