اربيل مضكورة بالكتب ، وعلى الأكثر احتمال تكون هي المربع الأول !! لأن ضاكرين بالكتب القديمة ان معنى اربيل يعني اربعة ايل .. (اربعة الهة) ، يعني اربيل من زمان مشتغلة عدهم سالفة الشراكة حتى بالإله !! بس أربعة هواي ،، والعباس هواي !! يعني حتى يتخذون قرار يحتاجون يومية (مؤتمر اربيل ) ويجون (الإيلات ) الاربعة ويجتمعون على الطاولة المربعة!! وراح وكت واجه وكت وصارت اربيل عاصمة وكلشي بيها والامن مستتب جدا ، وكلما صارت ازمة راحوا رؤساء الكتل واجتمعوا باربيل .. لان بغداد (حارة ) والخضراء بس بالاسم ولا قطعة خضار بيها .
لذلك صاروا القادة كلما يتوازون فروا (إيلاتهم ) وراحوا لأربيل .. اللي يريد ينزع الثقة يروح لاربيل .. واللي شارد من الاعدام يروح لاربيل .. واللي يريد يسوي شراكة وطنية يروح لاربيل .. الله اكبر جا بس هناك اربعة إيل غير يقسموهم بالتساوي !! المهم ، السالفة رطينة .. والوادم شاردة من الوضع الامني ومن الحر وكلها تصيف بأربيل وتشرب لبن اربيل .. صدك ليش لبن اربيل موجود بالنجف .. وطرشي النجف ماكو باربيل ؟؟ هسة حتى لو نوديلهم دهينة!! ..
وبينما نحن كذلك
وهم ليسوا كذلك !!
فإذا بخبر عاجل ..
يتحدث عن انفجار هائل ..
قد احرق الاخضر واليابس ..
وذكرنا بمعركة الغبراء وداحس !!
عمي ياداحس ؟؟ يكولون الارهابيين غاروا من قادة الكتل ورادوا يسوون مؤتمر اربيل .. لذلك قاموا بانفجارات استباقية لوجستية !! والله ما ادري (اللوجستية ) راهمة بهذا المقال لولا ؟؟ ماعلينا .
azad al iraqi 
29/09/2013 - 09:10
البداية
السابق
