من چنت صف ثاني ابتدائي چنت كلش عاقل ومسالم.. اروح بدربي واجي بدربي ..وچان ويايه بالصف ولد كللللش وكح ومينجرع ومخلصها بس يتحارش بالجهال.. ويتعارك ويه ذبان وجها..يگمز ويلغي ويصيح وهارج الصف هرج وچنت اضوج منه حيل ودائما اتجنبه وما اندگ بيه ولا اتقربله لان چنت اتچفه شره..
فديوم من الايام دگ الجرس للصفوف وقبل لتفوت المعلمه للصف بهاي الفتره تصير هوسه بالصف هذا اليدگ على الرحلات هذا اليحچي ويه صاحبه هذا اليركض هذا اليغني ..
كلها چانت تهوس بس اني چنت گاعد برحلتي ومطلع دفتر واكتب ..
وهذا الولد الوكح كالعاده چان يگمز على الرحلات ويركض بالممرات البين الرحلات رايح جاي رايح جاي ركض..
اني اثناء ما چنت گاعد برحلتي چان شويه من رجلي طالعه على الممر وهذا مخلصها يركض وصل يم رجلي وعثر بيها وانگلب حيل بالگاع ..
اني من شفته انگلب انگلبت روحي وياه ..
چان يخزرني وهو ممطول بالگاع وگال: توگعني?
اني باوعت عليه واختفى صوتي من گد الخوفه والصدمه اريد الحچايه تطلع من حلگي متطلع وبعدين گتله والله ماادري بيك انت عثرت.
گال اليوم العب بيك لعب انت توگعني اني? من اممممداني!!!
وهستوه يريد يگوملي چان تفوت المعلمه..
اني ارتاحيت ورجع الدم بوجهي وگلت راح شرها الحمد لله..
وگلت يله منا على متجي الفرصه مية عمامه تنگلب بلكي ينساني..
المهم من دخلت المعلمه وقيام وجلوس گعدنه .. چان هو يرفع ايده وگلها ست عماد ذبلي رجل ووگعني..
اني تفاجأت گلت هاي شلون شغله اطلع من حفره اوگع بدحديره هاي المعلمه بعد اضرب منه..لان عصبيه وتشيل صونده سوده مال مجاري وتكتل بيها..
هي گلتله منو وگعك?
گلها: عماد!!
گلتله: يعني من كل عقلك تريدني اصدگ عماد الفقير الحباب يوگعك انت القرد?!! ولك تريد تضحك عليه?!!
اني بهاي الاثناء صاير بين حانه ومانه .. واباوع على حلوگهم وهم يتناقشون ومنتظر منو راح يكتلني المعلمه لو الوكح..
عاد گلتله : تعال ولك تعال انت وكح متنجرع واكيد تتبلى عليه..
ولزمته كتلته كتله حنينه بالصونده نزعت جلده نزع..
وگامت تضربه واني بگلبي اصيح اااخ..بيه ولا بيك حبيبي ..
طبعا مو حباً بيه بس اني اعرف كل ضربه راح يرجعلياها عشره..
المهم انكتل ورجع لرحلته يبچي بس بقى الدرس كله يخزر بيه ويسويلي بيده هاي الحركه مال بسيطه..
اني اباوع عليه وادعي يارب ميدگ الجرس فرصه.. تمنيت الدرس يبقى طول العمر..بس صار العكس من گد الخوف خلص الدرس برمشة عين..
عاد هو اجاني ولزمني من ياختي وگال اموتك اليوم..
اني اگله .. هد واني اهد..
وگام يضرب بيه ما لذ وطاب من انواع الضرب ..
واني اگله .. هد واني اهد ..
زورگني تزورگ ..
واني اگله .. هد واني اهد..
مسح بيه الگاع..
واني اگله .. هد واني اهد..
دمرني تدمر ..
واني اگله .. هد واني اهد ..
والحلو بالموضوع اني ابد ملازمه بس افرح بنفسي واگله..
هد واني اهد ..
عاد خليته يشبع ضرب بيه كللللش مخليت شي بنفسه راشديات على چلاليق على بوكسات ..
اني کل اللي سويته چنت اگله..
هد واني اهد..
عاد من تعبت ايده من الضرب عافني وگال يله امشي وبعد لتوگعني ..
اني گتله لا عبالك اني اخاف منك ومضربتك!!
لا ..بس والله لو ما الحب بجيبي چان سحلتك سحل بس اخاف على الحب يوگع من جيبي واني هستوني مشتريه بدرهم ..
صدگ لو گالو ..يا گاعدين يچفيكم شر الجايين!!!
