الابطال: ام خالد وام سالم
المكان: البصرة – الحيانية
الوقت: السادسة والنصف صباحا
ام خالد: صباح الخير ام سالم .. ها خيه شعدج اليوم من الصبح واكفه بالباب وتتراجفين.
ام سالم: يا خير خيه يا خير
ام خالد: شكو خيه شصاير
ام سالم: انا كاعده من الاربعة الفجر ولحد هسه ما نايمين.. اويلي عليك ابو سالم .. اويلي عليك يمه سالم
ام خالد: هاي شبيج احجي شمالج ..شبيهم ابو سالم وسالم
ام سالم: خيه الفجر طبوا علينه الجيش ما ادري هاي القذرة ما ادري شيسموونه.. واخذوا سالم وابوه.. ما اعرف ليش .. وين خذوهم ما ادري؟
ام خالد: يع عزه العزاني ..شررراخ لطمة على الوجه... ليش خيه شمسوين
ام سالم: خيه ما ادري .. ما مسوين شي.. همه شعدهم ..شو يطلعون من الصبح للشغل ويرجعون العصر بهل العماله هاي .. ويكضونه كاعدين اكبال التلفزيزن ... ويسولفون اشكال المالكي واشكال البرزاني واشكال السيستاني واشحط مقتده.. والحكومة هيج وحزب الدعوة هيج.. كتلهم عمي ستروا علينه .. ذاك السبوع خذوا ابن ام حامد جه حاجي عليهم .. عمي فكونه ستروا علينه .. احنه شنه غرض بيهم ..نارهم تاكل حطبهم.
ام خالد: يا خيه... هاي سوالف ابو سمير .. هذا من حزب الدعوة والوادم تكول وحته ابو خالد كال هذا جاي يكتب تقارير على الوادم ويكسر بركابهم.. الله يكسر ركبته.
ام سالم: الله لا ينطيه .. صاروا اطكع من البعثيين .. شدعي عليهم هجموا بيتي .. كبل راح ابني الزغير شاكر عدمه صديم .. وهسه راحو مني النوب سالم وابوه .. المن اروح المن احجي .. شسوي خيه شسوي
ام خالد: والله ما ادري خيه .. ما عدكم كرايب .. واحد بحزب الدعوة .. ترحيله بلكي يتوسطلهم ويطلعهم
ام سالم: ما عدنه خيه منينه .. شدعي عليهم شدعي.. راح اكنس عليهم باب العباس سلام الله عليه
ام خالد: خيه ما طار طير وارتفع .. هذوله ما يخافون من الله وطغو.. كبل صديم شعمل بينه .. وهسه هذا المالجي ابو حنج طلع اخس منه.
ام سالم : خيه هسه شسوي.. وين اروح.. هذوله بس لا يكتلونهم مثل ابن ام حامد ويذبونهم بالزباله خيه.. انهجم بيتي خيه
ام خالد: الله يساعدج خيه .. تعاي وياي للبيت اتريكي .. ونشوف ابو خالد شيكول .. بلكي يعرف احد... يله خيه امشي امشي.
