الابطال:ابو منصور وابو خلف
المكان: البصرة – الشرش
الزمان: الخامسة عصرا
ابو منصور: كواك الله ابو خلف .. هاا اليوم طاك العكال والعباية .. صاير شيخ .. وين جنت
ابو خلف: الله يكويك ابو منصور .. والله جنه بالكعده مال شيخ شفيق سته امبير
ابو منصور: سته امبير شني .. ويا شيخ شفيق هذا؟
ابو خلف: شيخ شفيق ابو الحسينية الي نصلي وراه .. وكيل السيستاني.. شل القضية نسيته شنو؟
ابو منصور: هااا .. خير شنو صاير عنده
ابو خلف: والله ابو منصور ما ادري شاكلك .. سالفه غبره .. هالوادم ما ينعرف صدكها من جذبها..اه اه
ابو منصور: هاا خويه تتحسر .. شصاير.. تعال اكعد يمي بالديوانية نشرب جاي ونسولف
ابوخلف: امشينه خويه امشينه.. يا الله ... سلام عليكم
ابومنصور: عليكم السلام .. زارتنه البركة
ابوخلف: البركة بيك ابو منصور.. اي خويه نكمل سالفتنه.. السالفة وما بيها .. هذا محيسن ابو المولد الي من بيت شلال مكاوم شيخ شفيق
ابو منصور: على شنو؟
ابوخلف: شيخ شفيق صارله خمس سنين يبوك من محيسن كهرباء وهو ما يدري
ابو منصور: شنو شنو... يبوك كهرباء ؟... شلون صارت هاي؟
ابوخلف: خويه هذا شمسوي.. جايب جوزه ستين امبير وماسح الصفر مالهه ومسويهه 6 امبير وناطيهه لمحيسن على اساس 6 امبير .. ومن ذاك اليوم لحد كبل شهر ياله فاكس بيه .. ومن دره بيه .. هد عليه للبيت ويكول اكتله اكتله هذا الجذاب .. لابس عمامه ويقشمر علينه هيجي اسوي بيه .. اله اخنكه بعمامته .. المهم غالط عليه وسابه وطاكه جلاق.
ابو منصور:يا بويه هاي شني هاي .. هذا شلون يسوي هيج .. جا شو اربعة وعشرين ساعة يحجيلنه بالحلال والحرام ويبيع علينه هيوات ... يا بوية وين راح توصل بينه .. راح يكلبونهه بينه هذوله.
ابو خلف: لا تكلي ولا اكلك .. جيب الليف ودي الليف .. وهاي الخاطر السيد وهاي الخاطر فلان .. بوس عمك بوس خالك .. تراضوا وشدوا راية العباس ب 30 مليون دينار والي كفل شيخ شفيق سيد عماد البطاط لان هو جاي وياهم ويكول دازني السيستاني حته احل هاي الشغله.. وعشيرة محيسن شرطو على شفيق بعد ما تصلي بالحسينية .. وكلوا لسيد عماد شوفولنه واحد جديد يصلي بينه بالحسينية بس هالمرة ما نريد واحد حرامي.
ابو منصور:يبوي شكبره هاي ... بس زين يسوون بيه.. اكلك هذا الجديد الي راح يجيبونه بس لا يطلع يبوك نعل النوب
ابوخلف: هههههههههه ... والله ما اجوز من سوالفك ابو منصور
ابو منصور: والله جا خويه واحد لزموه عريان ويه وحده بالعمارة ... و واحد باك مكتبهم بالنجف وكتلوه وهسه هذا يبوك كهرباء .. جا هذا الي راح يجيبونه اكيد يبوك نعل لو دياي ... خلي اروح اسوي الجن مال الدجاج زين ..اخاف عليهن ينباكن خليهن فايدات الفروخ بالبيض.
ابو خلف: يله اروح انا ... في امان الله .. خلي اروح اسوي الباركه مال الغنم لا صدك النوب يجينه واحد حرامي هوش وغنم.
