عصابة سمسرة... دراما ساخرة

ابوسرمد: خويه هاي معاملة مال اجازة مال بانزين خانه .. يم وزارة النفط.. ويومية مطلعيلي شغله بيهه .. جيب موافقة فلان وحط موافقة علان .. ويوم المدير الفلاني مسافر ويوم الوزير عنده اجتماع .. وعلى هاي الجنجلوتية .. وماكو قبض.

ابوعلي: شنو هاي صدك جذب ابو سرمد .. وانت صارلك سنة بهاي الشغله

ابو سرمد : اي والله خويه سنة اركض والعشى خباز

ابوعلي:وانت ليش متعب روحك تروح وترجع وتخسر فلوس وتخاطر بحياتك.. ليش ماكتلي .. انا ادليك على الطريق واحله الك.

ابو سرمد: الله وايدك ابو علي كول شلون تحله.

ابو علي: خويه ما دام الشغلة يم وزارة النفط سهلة .. تروح لابو حسن الساعدي .. بيتهم بالشارع الي ورانه.. تعرفه لو لا؟؟

ابو سرمد:ابو حسن هذا الي بحزب الدعوة.. الي جان بالامن الوطني .. لو غيره.

ابو علي:هو بعينه

ابو سرمد: وهذا شنو شغله. وشلون راح يحلهه.

ابو علي: خويه انت شبيك غشيم .. هذا هو الي يكمل شغلتك .. ذولي هو وعنده اشكم واحد وياه .. عدهم اتصال مباشر ومرتبين وضعهم بكل الوزارات وخاصة النفط .. خويه ذولي اتصالهم بالشهرستاني عن طريق ابو ميثم الساعدي.. اكيد سامع بيه.

ابو سرمد: طبعا سامع بيه .. هذا هو الشغل كله يمه .. والوزير طرطور عنده.

ابو علي: هاا شفت .. تروحله وتوديله المعاملة .. وشوفه شراح يكلك.. هسه يخلصه الك بيومين وبتوقيع الشهرستاني والوزير.. وكلشي بفلوسه .. انت بس ورقله .. وهو اكيد راح يكلك اشكد تكلف.. بس احسب حسابك مو اقل من عشر شدات ( 100 الف دولار)

ابو سرمد:عمي مستعد ادفع عشر شدات عشرين شدة بس خلي اخلص لان طلعت روحي من الروحه والرجعة.. هو بس كون صدك يكملهه ويجيبلي اجازة.

ابو علي: خويه ابو حسن كلشي عنده وكلشي بسعره .. انت هسه روحله للبيت وشوفه شيكلك... واذا ما لكيته بالبيت راح تلكاه بمضيف صوب الله بالطويسة لان هو يكعد هناك .. واذا ما لكيته هناك اسأل على شيخ باسم هو هم يشتغل وياه ويكدر يرتبلك الوضع.

ابو سرمد:رحم الله والديك ابو علي .. هسه انا رايحله.

الساعة الثامنة مساءا رجع ابو سرمد للبيت وصادف ابو علي بالشارع

ابو علي: هاا ابو سرمد بشررر... شنو صار وياك.

ابو سرمد: خوية بيش اجازيك.. غير تكلي من البداية انت على هاي السالفة.. خويه انشاء الله خلصت .. لكيته بمضيف صوب الله وسلمته المعاملة .. وكلي شغلتك مكضية وانطه المعاملة لولد اسمه احسان هذا الي يشتغل بالمحافظة هسه مستشار لخلف .. وكله انت تروح بيهه لبغداد وتخلصهه لابو سرمد.

ابوعلي : ها خوية شكتلك.. موو كتلك يكملهه... اشكد راد منك

ابو سرمد: رادو عشرين شده هو وجماعته.. انا كتلهم لا 15 شده انطيكم نصهن هسه ونصهن ورى ما استلم الاجازة... وزين وافقوا.. وكلي هذا احسان شتحتاج من المحافظة او اي وزارة احنه حاضرين.

ابو علي: على الخير ابو سرمد.. عود لا تنسانه خويه من نجي نفول بنزين من يمك

ابو سرمد:هههههههههه تدلل ابو علي تدللل

مقالات اخرى للكاتب

أضف تعليق

نطلب من زوارنا اظهار الاحترام, والتقيد بالأدب العام والحس السليم في كتابة التعليقات, بعيداً عن التشدد والطائفية, علماً ان تعليقات الزوار ستخضع للتدقيق قبل نشرها, كما نحيطكم علماً بأننا نمتلك كامل الصلاحية لحذف اي تعليق غير لائق.