المسكينة ام جواد البارحة هاج عليهه القولون العصبي، بالمناسبة صار القولون الاشارة العراقية، يعني مو عراقي ميه بالميه الماعنده قولون، ايه البفصم الللي اكلناه ايام زمان والخبز الجنه طابوك والخوف والوجع والادوية المغشوشه المالية السوك من دون رقيب ولا حسيب، المهم مرينه على السيطره لكينه سره طويل ، ومثل ناكوط الحب سياره سياره، ومرت ساعة وحنه تيتي تيتي، عيوني وأم جواد تتلوه واحنه حاطين ادينه على خدودنه وساكتين، شنسوس، شبدينه، وكل شويه ماره سيارات سوده وبيضه ورباعية الدفع وعكس السير، رفعت ام جودي الورده راسهه وباوعت ، كالت ردني لهللي ؟
ماعرف شلون ارجعهه دكت من الباب للمحراب، والسيارات القانونية بدولة القانون تمشي وهي تصيح.... ويط .. ويط .. ويط.. وعكس السير، وماكو لاتفتيش لاوكفه ، شرطي المرور يباوع، الجيش يباوعون، الدنيه اتباوع، المهم حسبنه السيارات المرت عشرين موكبن والشعب واكف والسيارات تتفتش ، والسؤال لما السيارة توصل يم السيطره ـــ افتح الصندوك هاي سيارتك لو لا امشي!!
والناس تباوع محد يعترض ، تخاف من الجلمه الموزينة، المهم، وصلنه السره، أني عبالي الضابط ابو النجمه كلي اطلع لان وياي عجايز وانه شايب، اثاري كلي اطبك على التفتيش ، طلعت مسرعا.....ههههه ، ولن الصياح وراي.ارجع ارجع، وكفت هاولكم اخافن السيارة بيهه شي لوأم جواد مفخخه، اجاني الضابط الامريكي... ايه لابس ملابس مال امريكان وطالع فص كلوص ـ، باوع علينه وخزرنه وكال بصوت الله .. الله ـــمو كتلك على التفتيش ليش ما تنفذ الاوامر ياللله ارجع ؟
كتله ـــ عمي بعد روحي انت عراقي؟
هز راسهوكلي ـــ ارجع اكلك!!
كول ارجعنه بالقوه ــ عمي الله يخليكم هاي عمتكم ام جواد قولونهه هايج عليهه واريدن اوديهه للطبيب؟
محد دار بال كول وصلنه للتفتيش، لانه جندي حباب وخوش وليد ، كل ــ السياره بسمك؟
ــــ ايه عمي بسمي!!
ـــاطلع !!
طلعت وما اشوفن ام جواد اله وصارخه ، ــ ولك ابن كريمّ اوكف !!
انه ما اكدر ارد طلب لام جواد عصبيه وكلبهه محروك ومشتويه شوي من الدنيه وطلايبهه، تركتني ونزلت لان شافت رايد بالجيش ، عيوني تافخ نفسه، ايه حقه ينفذ الواجب، يحمي الشعب ، يدافع عن الشعب لانه ابن الشعب ومن الشعب، ايباخ،مادري ليش تذكرت اغنيه سعدي الحلي الله يرحمه.. كلهه منك زاد همي وكثر!!
المهم مطرت ام جودي، راحت على الرايد الحباب، سلمت عليه، وباوعته زين.. وكلتلهه ــ يمه فدوه لهل جهامة انتم موش دولة القانون والقانون يتنفذ على الامير والغفير والجبير والزغير والحرامي والغفير والبشوش والحمير،
الضابط باوع ووجهه ما يكصه السيف، ايه حقه ضابط واحنه شعب ولازم ننتظر وننهان وننشتم ونسكت،كللهه ـــ ايه وبعدين!!
بس بصوت مال واحد ما عاجبه الحجي.. كلتلهه ــ وانتم كاعدين هناه وتعبانين حتى تنفذون القانون بس مايصير تمرون السيارات مال الجماعة رون سايت والنوبه محد يفتشهه .. ثواب لبوك ولامك اشو انتم سويتوا الشعب متهم وهو الضحية.. مخلين الضحية تسرح وتمرح اكولن يمه تكدر تضمنلي هاي السيارات ما بيهه قارش وارش موش السلاح الطب للبرلمان بهاي السيارات موش الاسلحة جانت تنقل من مجان المجان بهاي السيارات، عمه انتم ولدنه وعفيه عليكم بس لاتوكوفون ويه الباطل ضد الحق والحق شعبكم واهلكم وانتم جيش العراق موش جيش علان ولابلان!!
الضابط الخوش ولد، الحباب ، الرايد ن باوع زين ونفخ نفسه وكال ــتفضلي روحي ولا تحجين على دولة رئيس الوزراء ولا على الدوله ؟
اها .. اضبط ... طلعت السالفه غبره .. الجماعة اثاري موش ربعنه ربع الحكومة ، احنه وين والسالفه وين، وأنه خايف صدك خايف من سالفة اصدارقاون يكول باعدام كلمن يمس الذات الحكومية، مثل كبل اللي يسولف نكته ينعدم كبل، صعدت ام جواد والضغط صاعد ، والقولون مرتفع، وخلينه ورجعنه لان الدرب الثاني جان مسدود ، تدرون ليش لان الست النائبة(( ....... )) جانت تريد تروح لهلهه وطوط .. طوط .... والله يرحم عزيز علي.. لومن كالـ ــ والنواطيرالنشامة نايمين من زمان ... وأخ من لسان أم جواد ...أخ كلبي كام يوجعني ، هو هذا وطن لو خراب خانه !!
